Ի՞նչ անել, եթե անգրագետ ես. օրինակներ ԵՊՀ-ից (լուսանկարներ)

Ի՞նչ անել, եթե գրագիտությունդ թույլ չի տալիս թաքցնել տգիտության աստիճանը։ Առաջարկում ենք «հետևել» Մայր բուհի օրինակին․ հերքել ամեն ինչ և ամեն բան։ Հերքել փաստի գոյությունը, սեփական միտքն ու գիտական արժեքները։

Ի՞նչ անել, երբ մոռացել ես շնորհավորել Ամենայն հայոց բանաստեղծի ծննդյան 153-ամյակը։ Գուցե նյութ կամ գոնե պատմական ակնարկ հրապարակե՞լ հաջորդ օրերի ընթացքում։ Իհարկե՝ ոչ։ ԵՊՀ-ն առաջարկում է պատրաստել արհեստական բեմախաղով հոլովակ և գովազդել Երևանի կենդանաբանական այգուց ԵՊՀ եկած մամուլի խոսնակին։ Ի դեպ, ավելի լավ էֆեկտի համար հոլովակը պետք է հրապարակել սխալ տեքստով՝ ապագա դիմորդի փոխարեն դիմելով ապագա շրջանավարտին։

Ի՞նչ անել, եթե սխալ հերքում ես տարածել։ Նույնիսկ ակնհայտ փաստերի դեպքում երբեք չընդունել սխալն ու շարունակել նույն ոճով։ Չէ՞ որ «Ընկերների» ՊՈԱԿ-ը միշտ քո կողքին է։

Ի՞նչ անել, եթե ԵՊՀ-ի պաշտոնական ֆեյսբուքյան էջում ուզում ես մշտական ակտիվություն պահել։ Հրապարակել նյութեր, հասկանալ, որ դրանք սխալ ու բուհին ոչ հարիր բովանդակություն ունեն (գոնե թե համալսարանականները կհիշեն վերջերս հրապարակված՝ բարձրագույն կրթության դերը նվաստացնող հարցումն ու գունավոր հեռուստատեսության ստեղծողի սխալ նկարը) և ջնջել։

Եվ վերջապես, եթե այսօր ԵՊՀ-ի դեմքը դարձած մամուլի խոսնակին սեփական գրագիտությունը թույլ չի տալիս առաջին անգամից ճիշտ գրել «արևոտ» ու «կարևոր» բառերը, Ֆեյսբուքը հնարավորություն է տալիս դրանք մի քանի անգամ խմբագրելու։

Այսպիսով՝ ԵՊՀ-ն կրթելու, փաստերը ճիշտ ներկայացնելու ու պրոֆեսիոնալ կադրեր աշխատանքի հրավիրելու փոխարեն առաջարկում է տգիտությունը «պարզաջրել»՝ մարդկանց կարևորից շեղելով ու անհատների PR-ն իրականացնելով։