Մեծ հարց է, թե ով է թշնամու շահերը սպասարկում․ մնում է՝ մի հատ էլ հայհոյանք դնեք քվեարկությունից առաջ․ ՔՊ-ականները՝ Օհանյանին (տեսանյութ)
Նախորդ տարի ԱԳ նախարարությունն իր արձագանքում նշել էր, որ թե Շուշիի հռչակագիրը հակահայկական սադրանք է և սպառնալիք տարածաշրջանային անվտանգությանը։ Այս մասին Ազգային ժողովի նիստում հիշեցրեց «Հայաստան» խմբակցության ղեկավար Սեյրան Օհանյանը՝ ի գիտություն հայտնելով, որ այդ ժամանակվա արտգործնախարարության աշխատանքն այսօրվա կառավարության ղեկավարության կողմից բազմիցս քննադատվել է։
Նա նկատեց, որ 2021 թվականի հունիսի 20-ի ԱԺ ընտրություններից հետո արդեն այս իշխանությունը և խորհրդարանային կառավարման երկրում ԱԺ-ն, որպես առաջնային մանդատ կրող պետական կառույց պետք է գնահատական տա՝ ընդգծելով իր մտահոգությունները, որ այն դեմ է ՀՀ Անկախության հռչակագրին:
«ԱԺ լռությունն այս թեմայով կդառնա համաձայնության նշան թուրք-ադրբեջանական տանդեմի կողմից նախաձեռնած պատերազմում պարտության և հետագա անհաջողություններին, ՀՀ իշխանությունների վրա շարունակական ճնշումներին, որը նախապայմանների ձևով արտահայտվել է հռչակագրում»,- ասաց Սեյրան Օհանյանը։
Նա նկատեց, որ հռչակագրում Արցախը դիտարկվում է որպես Ադրբեջանի մաս, և թուրք-ադրբեջանական զույգը պահանջում է «Զանգեզուրի միջանցք», մերժում են Հայոց ցեղասպանությունը և առաջարկում թեման տեղափոխել պատմաբանների քննարկման դաշտ, և եթե Հայաստանը որոշի այս դժվար պարտված դիրքից ոտքի կանգնել, ապա միասնական կգործեն նրա շահերի դեմ:
Հաշվի առնելով քաղաքական մեծամասնության տեսակետը, որով վերջիններս պնդում են, թե այդ հայտարարությունը կխանգարի խաղաղության դարաշրջանի բացմանը՝ Օհանյանը հակառակն է պնդում՝ այն ամբոջությամբ՝ 100%-ով ազգային է և պետական աջակցությանն է ուղղված:
«Հայտարարության ընդունումը բխում է ՀՀ անվտանգության ամրապնդման շահերից, այն մեսիջ կլինի և՛ Հայաստանի, և՛ Արցախի ժողովուրդներին, և՛ աշխարհասփյուռ հայությանը, միջազգային հանրության և մեր գործընկերներին, որ մենք այդ գործընթացում ունենք կարմիր գծեր և չենք նահանջելու դրանից, այսինքն՝ իշխանության և հայ ժողովրդի արժանիքների կորուստ չի լինելու»,- հայտարարեց Սեյրան Օհանյանը։
Նա առաջարկեց ներառել նիստերի օրակարգ ու քննարկել․ «Հակառակ դեպքում մենք այն կդիտարկենք թշնամու շահերի սպասարկում»:
ԱԺ նախագահի պաշտոնակատար Հակոբ Արշակյանը նշեց, որ դա սպառնալիք էր ու հորդորեց զերծ մնալ սպառնալիքի տոնից:
ԱԺ փոխխոսնակ Ռուբեն Ռուբինյանն էլ կողքից միջամտեց․ «Դա շատ մեծ հարց է, թե ով է թշնամու շահերը սպասարկում»։
Հակոբ Արշակյանը կրկին հորդորեց Օհանյանին չխոսել սպառնալիքի լեզվով ու հավելեց․ «Մնում է, որ մի հատ էլ հայհոյանք դնեք այս կամ այն քվեարկությունից առաջ»։
