Դեպի Կիև է շարժվում ռուսական ռազմական տեխնիկայի 60 կիլոմետրանոց շարասյուն

Ուկրաինայում մեծանում են մտավախությունները Կիևի և երկրի այլ քաղաքների վրա ռուսական զորքերի կողմից նոր զանգվածային հարձակումների վերաբերյալ: Երկուշաբթի՝ փետրվարի 28-ին արված արբանյակային լուսանկարները ֆիքսել են Կիևից հյուսիս-արևմուտք ռուսական ռազմական տեխնիկայի 60 կիլոմետրանոց շարասյունը: Ավտոշարասյունը ձգվում է հարավում գտնվող «Գոստոմել»-ի օդանավակայանի մոտեցումներից (Կիևի կենտրոնից 25 կմ հեռավորության վրա) մինչև հյուսիսում գտնվող Պրիբիրսկ գյուղի ծայրամասերը: Այս մասին գրում է DW.com-ը՝ վկայակոչելով ամերիկյան «Maxar» արբանյակային ընկերությանը։

Նկարներում տասնյակ մեքենաներ են երևում։ Նրանցից մի քանիսը գտնվում են միմյանցից շատ մեծ հեռավորության վրա, մյուսները՝ 2 կամ երեք մեքենայի խմբերով։ Առանձին նկարներում երևում է ծուխը, որը ենթադրաբար այրվում է տարածքում գտնվող շենքերից: «Maxar»-ը հրապարակել է նաև լուսանկարներ, որոնցում երևում է, որ ուղղաթիռներն ու մեքենաները շարժվում են Բելառուսում՝ Ուկրաինայի հետ սահմանից 30 կիլոմետրից պակաս հեռավորության վրա:

Փետրվարի 24-ին Ուկրաինա ռուսական ներխուժման մեկնարկից ի վեր ուկրաինական ուժերը հայտնել են Կիևի վրա ռուսական մի շարք հարձակումների հետ մղման մասին: Խոշոր մարտեր են մղվել «Գոստոմել»-ի օդանավակայանի համար։ Ուկրաինական դիմադրությունը դանդաղեցրել է ռուսական զորքերի առաջխաղացումը, սակայն Ռուսաստանն ավելի ու ավելի մեծ ուժեր է տեղափոխում Ուկրաինայի խոշոր քաղաքներ և ուժեղացնում է հրետակոծությունը: Փորձագետներն ակնկալում են ռուսական նոր զանգվածային հարձակում մոտ ապագայում։