«ԳիտՍԵՐունդ»-ի ուսումնական նյութերը հասանելի կդառնան Հայաստանի բոլոր ուսուցիչներին․ կստեղծվի համագործակցության նոր միջավայր

Ս․թ․ մարտի 7-ին Հայաստանի ամերիկյան համալսարանում տեղի ունեցավ «Ակտիվ ուսումնառությունը ԳիտՍԵՐունդի հետ» համաժողովը և «ԳիտՍԵՐունդ» ծրագրի ընդլայնված աշխատարանների բացման արարողությունը։ Համաժողովի բացմանը ուղերձներով և բացման խոսքով հանդես եկան ՀՀ-ում ԱՄՆ դեսպան տիկին Լին Մ․ Թրեյսին, ՀՀ ԿԳՍՄ փոխնախարար Ժաննա Անդրեասյանը և Հայաստանի ամերիկյան համալսարանի նախագահ դր․ Կարին Մարկիդեսը։

Համաժողովը կազմակերպվեց «ԳՏՃՄ կրթություն Հայաստանի երիտասարդների համար» («ԳիտՍԵՐունդ») եռամյա ծրագրի շրջանակներում։ Ծրագիրն իրականացնում է Հայաստանի ամերիկյան համալսարանը՝ ՀՀ-ում ԱՄՆ դեսպանության ֆինանսավորմամբ։

Համաժողովի ընթացքում մեկնարկ տրվեց «ԳիտՍԵՐունդ» ծրագրի շրջանակներում նախագծված դասավանդման և ուսումնառության նյութերի մշակման հատուկ թվային հարթակի աշխատանքին, որը «ԳիտՍԵՐունդ»-ի ուսումնական նյութերը հասանելի կդարձնի
Հայաստանի բոլոր ուսուցիչներին և կստեղծի ստեղծարար ուսուցիչների համագործակցության նոր միջավայր։

Երկօրյա համաժողովը մեկ հարկի տակ էր միավորել Հայաստանի բոլոր մարզերից ավելի քան 300 ուսուցիչ, որոնք կմասնակցեն և կդիտարկեն «ԳիտՍԵՐունդ»-ի ուսուցչական աշխատարանները, «ԳիտՍԵՐունդ» ռեսուրսներով դասավանդվող դասերը, կմասնակցեն
«ԳիտՍԵՐունդ» թվային հարթակին գրանցվելու և դրանով աշխատելու սեսիաներին, ինչպես նաև կմասնակցեն դպրոցների տնօրենների, ոլորտի փորձագետների, ուսուցիչների և աշակերտների մասնակցությամբ պանելային քննարկումներին։

Համաժողովի մասնակիցները տեղեկացան ԳՏՃՄ կրթության զարգացմանն ուղղված Հայաստանի Հանրապետության կառավարության ջանքերի ու ծրագրերի, ինչպես նաև գիտության և գիտատար արդյունաբերության համար մարդկային կապիտալի զարգացման գործում ձեռքբերումների մասին։

«ԳիտՍԵՐունդ» ծրագրի գլխավոր նպատակն է բարելավել ԳՏՃՄ առարկաների դասավանդման և ուսումնառության փորձառությունը։ Այս նպատակին հասնելու համար ծրագիրը կազմակերպում է ուսուցչական աշխատարաններ և մշակում է նոր սերնդի ուսումնական նյութեր, որոնք ուղղորդում են ուսուցիչներին իրենց առօրյա դասավանդման գործընթացում ակտիվ ուսումնառության մեթոդներն ու մոտեցումները լավագույնս կիրառելու համար։

2019 թվականի հոկտեմբերի մեկնարկից ի վեր, ծրագիրն աշխատել է ավելի քան 400 ուսուցիչների հետ, որոնք մշակել և փորձարկել են ԳՏՃՄ դասի պլաններ և քայլ առ քայլ ընթացքներ կամ սցենարներ, որոնք դյուրին են դարձնում ժամանակակից մանկավարժական գաղափարների և առարկայական բովանդակության ներմուծումը դասապրոցես՝ հնարավորություն տալով ուսուցիչներին անցկացնել բարձր ներգրավվածությամբ հետաքրքիր և արդյունավետ դասեր։ 7-12-րդ դասարանի շուրջ 2500 աշակերտներ մասնակցել են «ԳիտՍԵՐունդ» ամառային ճամբարների, սիմուլյացիոն և դեմ առ դեմ փորձարարական դասերին։ Ծրագրի ավարտին՝ ս․թ․ սեպտեմբերին, «ԳիտՍԵՐունդ» ծրագիրը կհրապարակի ԳՏՃՄ գիտակարգային 5 առարկաներից 1800 դասի համար նախատեսված դասավանդման և ուսումնառության նյութեր։

Այս տարի «ԳիտՍԵՐունդ» ծրագիրը հրավիրել է Կրթության զարգացման և նորարարության ազգային կենտրոնի առարկայական փորձագետներին՝ մասնակցելու ուսուցչական աշխատարանների ստեղծմանը և համագործակցելու կրթական նյութեր մշակող ուսուցիչների հետ, ինչպես նաև վայելել նրանց ակտիվ ներգրավվածությունը։

Նախորդ երկու տարիներին «ԳիտՍԵՐունդ» ծրագրին մասնակցած աշակերտների 75%-ը նշել են, որ ԳՏՃՄ առարկաների հանդեպ իրենց ունեցած վերաբերմունքը և ընկալումը դրականորեն փոխվել են, իսկ նրանցից 45%-ը նշել են, որ անպայման կդիտարկեն ԳՏՃՄ ոլորտում մասնագիտություն ընտրելու հնարավորությունը։ Ծրագրին մասնակցած գրեթե բոլոր ուսուցիչները, որոնք դասավանդել են «ԳիտՍԵՐունդ»-ի ռեսուրսներով, նշել են, որ անպայման կօգտագործեն այդ ռեսուրսներն իրենց առօրյա աշխատանքում և ցանկություն հայտնել մասնակցելու եղած ռեսուրսների բարելավմանը և նոր դասի սցենարների մշակմանը։