Արցախում հնչող կրակոցները և գազատարի խնդիրը Ռուսաստանի արձագանքը ստուգելու համար են. Ալեքսանդր Մանասյան

Արցախում հնչող կրակոցները և գազատարի խնդիրը Ռուսաստանի արձագանքը ստուգելու համար են: Այս մասին ասուլիսում ասաց փիլիսոփայական գիտությունների դոկտոր, պրոֆեսոր, ՀՀ ԳԱԱ թղթակից անդամ Ալեքսանդր Մանասյանը 

«Ռուսը ղարաբաղցուն պաշտպանեց այնքանով, որքան իրեն պետք էր, այնպես չէ, որ Ռուսաստանը պետք է թույլ տար ամբողջ Հարավային Կովկասն անցնել Թուրքիայի ազդեցության տակ»,- ասաց Մանասյանը:

Հաշվի առնելով, որ Արցախի շուրջ հետագա զարգացումները կախված են ուկրանական ճակատում տեղի ունեցած գործընթացներից՝ նա չբացառեց, որ եթե Ուկրաինայում Ռուսաստանը պարտվի, հնարավոր է Արևմուտքը դրական քայլեր անի Արցախի հարցում, քանի որ Արցախը ոչ միայն ՌԴ-ին է պետք, այլ նաև Արևմուտքին:

«Արցախը դուրս չէ միջազգային հարաբերությունների դաշտից: Արցախով են անցնում գլոբալ քաղաքական բոլոր միջօրեականները»,- նկատեց պրոֆեսորը և հավելեց, որ Արցախն այն կետն է, որտեղ կարող է փոխվել համաշխարհային դաշտի հավասարակշռությունը:

Ալեքսանդր Մանասյանի խոսքով՝ Արևմուտքին Արցախի լարվածության կետը պետք էր, քանի որ Խորհրդային Միության փլուզումից հետո էլ նա այդ տարածքում նպատակներ ուներ իրականացնելու, որն արձանագրվեց Վրաստանում, Ուկրաինայում և Մերձբալթյան երկրներում:

«Արևմուտքը պետք է ՆԱՏՕ-ի անդամ պետության բարեկամ Ադրբեջանին տեսներ ՌԴ-ի վրա գրոհելու ճակատներից մեկը, դրա համար էլ արցախյան հարցը մնում էր չլուծված»,- ասաց Մանասյանը:

Ըստ նրա, երբ Ռուսաստանն Ուկրաինայում ձախողվի և այնքան հյուծվի, որ Թուրքիան վստահ կլինի՝ կկարողանա մտնել և ողջ Կովկասը դարձնել թուրքական ազդեցության գոտի, այդ ժամանակ էլ Ադրբեջանը կբացի երկրորդ ճակատ: