Միրզոյանի հայացքից կարելի էր ենթադրել, որ նա հավանաբար շնորհակալություն է հայտնել Չավուշօղլուին՝ 100 տարի առաջ հայ ժողովրդին ցեղասպանության ենթարկելու, Արցախում Բայրաքթարներ կիրառելու համար. Ղազարյան

Ես կարծում եմ, որ ՀՀ ԱԳ նախարար Արարատ Միրզոյանի այցելությունը Թուրքիա, հերթական անգամ, և այս անգամ ԱԳ նախարարի կարգավիճակով, դա Թուրքիայի դիվանագիտության ձեռքբերումներից մեկն էր, քանի որ թուրքերին հաջողվեց այս պատերազմից հետո, այս նվաստացումից հետո, տալ ևս մեկ նվաստացման դրվագ՝ տանելով ԱԳ նախարարին Անթալիա՝ ֆորումին մասնակցելու համար: Այս մասին «Հայելի» ակումբում հայտարարեց ՍԴ աշխատակազմի նախկին ղեկավար Էդգար Ղազարյանը:

Նրա խոսքով՝ Արարատ Միրզոյանի այցն Անթալիա թուրքական իշխանությունների ձեռքբերումն է: 

«Ես վստահ եմ, որ եթե Արարատ Միրզոյանը և ՀՀ արտաքին գործերի նախարարությունը որևէ ձևաչափով նմանատիպ համաժողով կազմակերպեր Հայաստանում, ապա Մևլութ Չավուշօղլուն չէր մասնակցելու: Այդ նվաստացումը նրանք կարողացան տանել բովանդակայինից սկսած մինչև արարողակարգային, տեխնիկական դրվագներով: Բովանդակայինն այն էր, որ Չավուշօղլուն գոհունակություն հայտնեց իրենց ունեցած հանդիպումից, ձեռքբերված պայմանավորվածու թյունից: Եվ այդ գոհունակությունը հայտնում է մի պաշտոնյա՝ Թուրքիայի ԱԳ նախարարը, որ մինչև Արարատ Միրզոյանին Թուրքիայում ընդունելը բազմաթիվ առիթներով խոսել է այն նախապայմանների մասին, որոնց պարագայում կարող են կառուցվել հայ-թուրքական հարաբերությունները: Սա նշանակում է, որ, այո՛, նա կարողացել է դիվանագիտորեն հասնել հաջողության, որ այդ նախապայմանները հայկական կողմից ընդունվեն»,- ասաց Ղազարյանը:

Նա իր խոսքում ևս մեկ կարևոր կետ արձանագրեց, որը, ըստ նրա, կրկին հօգուտ Թուրքիայի էր: Խոսքն Արարատ Միրզոյանի գոհունակությամբ, բավարարվածությամբ լի հայացքն էր:

«Հանդիպման տեսագրություն չի եղել, քանի որ հանդիպումն անցել է փակ դռների հետևում, բայց Արարատ Միրզոյանի հայացքից կարելի էր ենթադրել, որ նա հավանաբար շնորհակալություն է հայտնել Չավուշօղլուին՝ նախնիներին, հայ ժողովրդին 100 տարի առաջ բնաջնջելու և ցեղասպանության ենթարկելու համար, հայ ժողովրդին ունեզրկելու, աշխարհասփյուռք դարձնելու համար: Հավանաբար, շնորհակալություն է հայտնել նաև 2020թ. թուրք սպաների՝ ադրբեջանցի սպաներին տված խորհուրդների, Բայրաքթարների կառավարման, Բայրաքթարներն ադրբեջանական կողմին տրամադրելու և Ադրբեջանին ուղիղ ռազմական և ռազմաքաղաքական աջակցություն ցուցաբերելու համար»,- ասաց Ղազարյանը: