Մեր տան աղամանն իր տեղում է՝ պահարանում է, երբ որ անհրաժեշտ է պահարանից հանում եմ, ճաշ եփելուց օգտագործում, հետո նորից դնում պահարանի մեջ. Ավանեսյան

Գիտեք, շատ ուրախ եմ, որ նման լայն հանրային քննարկում ստացվեց, և շատ կարևոր է քաղաքացիների վարքաբանական փոփոխությունների համար, որ այն լայն շրջանառվեց: Մեր նպատակն առողջ ապրելակերպի խթանումն է, առողջ սովորությունների սերմանումն է: Եվ որոշակի այսպիսի փոքր գործողություններով, որոնք որ հաստատված են, որոշ երկրներում փորձարարական ձևով այսպիսի քաղաքականության ընդունումը շատ լավ արդյունքներ է տվել, մենք, այո՛, շարունակելու ենք տարբեր մեթոդներով մեր քաղաքացիներին իրազեկել: Այս մասին այսօր լրագրողների հետ զրույցում ասաց Առողջապահության նախարար Անահիտ Ավանեսյանը:

«Այս ընթացքում շատերն են զարմացել, որ, այո՛, նման խնդիր կա, որ, այո՛, Հայաստանում օրական չափաբաժնի կրկնակին ենք մենք օգտագործում, ինչը հանգեցնում է մի շարք հիվանդությունների սրմանը, ավելացմանը: Նախագիծը քննարկման փուլում է: Առաջիկայում մենք հանդիպումներ կունենանք թե՛ ռեստորանային բիզնեսի ներկայացուցիչների, թե՛  սպառողների շահերը պաշտպանողների, թե՛ հանրային առողջության կազմակերպությունների հետ, կփորձենք նախագիծը քննարկել, ավելի լավ լուծումներ գտնե, լրացնել, մշակել և ներկայացնել կառավարությանը: Բայց միանշանակ շարունակելու ենք աղի օգտագործման սահմանափակման ծրագրերի խթանումը»,- ասաց Ավանեսյանը:

Նրա խոսքով՝ իրենք ոչ թե որևէ բան արգելում են, այլ փորձում են բերել վարքաբանական փոփոխությունների: 

Հարցին, թե որտե՞ղ է իրենց տան աղամանը, Ավանեսյանը պատասխանեց. «Մեր տան աղամանն իր տեղում է՝ պահարանում է, երբ որ անհրաժեշտ է, պահարանից հանում եմ, ճաշ եփելուց օգտագործում, հետո դնում նորից պահարանի մեջ»: