Նիկոլ Փաշինյա՞նն է ոստիկաններին զանգում և ասում, որ իրեն վիրավորել են. հարց՝ փոխոստիկանապետին

Այսօր ՀՀ ոստիկանությունում հրավիրված մամուլի ասուլիսի ժամանակ փոխոստիկանապետ Արա Ֆիդանյանը պատասխանեց լրագրողների հարցերին։ Լրագրողներին հետաքրքրում էր, թե ինչպես է ընթանում Փաշինյանի և նրա ընտանիքի անդամների հասցեին ենթադրվող վիրավորանքների բացահայտումը. Փաշինյանն ի՞նքն է ստուգում ԶԼՄ-ներն ու սոցցանցերը, թե՞ դրանով զբաղվում է ինչ-որ ծառայություն կամ ոստիկանության վարչություն։ 

Ֆիդանյանը, սակայն, խուսափեց ուղիղ պատասխան տալուց այն հարցին, թե ով է զբաղվում գործող վարչապետ Նիկոլ Փաշինյանի և նրա ընտանիքի անդամների հասցեին հնչող վիրավորանքների բացահայտմամբ։

«Կխնդրեմ հարց հնչեցնելիս պահել էթիկայի և կոռեկտության սահմանները։ Ոստիկանությունն ինչ-որ ծառայություն կամ սերվիս չէ»,- լրագրողներին դիմելով՝ ասաց փոխոստիկանապետ Արա Ֆիդանյանը և ներկայացրեց մի քանի վիճակագրական տվյալ․

«2021թ․ Հայաստանի Հանրապետության Քրեական օրենսգրքի 137․1 հոդվածի հատկանիշներով․ այն է՝ անձին ծանր վիրավորանք հասցնելը, գրանցվել է 268 հանցագործության դեպք, որից 17-ն ուղարկվել է դատարան, 134-ը կարճվել է, 16-ը կասեցվել է, իսկ 101-ը գտնվում է ընթացքի մեջ։ Գրանցված 20 դեպքը պայմանավորված է անձի հանրային գործունեությամբ։ 2022թ․-ի ընթացքում մինչ 2022թ․ մարտի 17-ը նույն հոդվածի հատկանիշներով գրանցվել է 240 հանցագործության դեպք, որից 4-ն ուղարկվել է դատարան, 83-ը կարճվել է, 5-ը կասեցվել, իսկ 148-ը գտնվում է ընթացքի մեջ։ Գրանցված դեպքերից 64-ը պայմանավորված է անձի հանրային գործունեությամբ»։

Ֆիդանյանի խոսքով՝ ուսումնասիրվում են բոլոր հնարավոր միջոցները, տարբերակները, որով կարող է լինել հանցագործության վերաբերյալ տեղեկատվություն։

Ֆիդանյանը նաև անպատասխան թողեց այն հարցը, թե Նիկոլ Փաշինյա՞նն է ոստիկաններին զանգում և ասում, որ իրեն վիրավորել են։