Խնդրում եմ ձեզ՝ վճարել Նիկոլ Փաշինյանի կողմից ինձ վրա դրված տուգանքը՝ 300.000 դրամը, ես գործազուրկ, բայց անկախ կարծիք արտահայտող ՀՀ քաղաքացի եմ

Գյումրիի բնակչուհի Լիլիթ Աղեկյանը բաց նամակով դիմել է դեսպաններին։ Նա մասնավորապես գրել է․

«ՀՀ–ում ԱՄՆ դեսպան Լին Թրեյսիին

ՀՀ-ում Եվրամիության դեսպան Անդրեա Վիկտորինին

ՀՀ-ում ՄԱԿ-ի մշտական համակարգողի պաշտոնակատար Լիլա Փիթրս Յահիային

Եվրոպայի խորհրդի երևանյան գրասենյակի գրասենյակի ղեկավար Մարտինա Շմիդտին
Հայաստանում աշխատող հարգելի տիկնայք

Ձեր աչքի առաջ Հայաստանում տեղի է ունենում դեմոկրատիայի դեմոնտաժ: Ընդ որում, այն տեղի է ունենում ձեր կողմից գովերգվող դեմոկրատական իշխանությունների ձեռամբ և կամքով: Սա իրականում փաշիզմ է:

Այսօր, դուք, ձեր երկները, միջազգային հեղինակավոր կառույցները, կարճ ասած, ողջ աշխարհը նախահարձակ եք եղել Ռուսաստանի նկատմամբ՝ որակելով այդ պետությունը բռնապետական: Իսկ Հայաստանը չորրորդ տարին է կազմաքանդում է ժողովրդավարության, մարդու իրավուքների հիմքերը:

Խոսքի ազատությունը, մարդու իրավունքները մեր երկրում տրորվում են շատ հետևողականորեն: Վստահ եմ՝ դուք դա տեսնում եք:

20.20.2020 թվականին, ես ՝ ՀՀ քաղաքացիս, հրավիրվել եմ ոստիկանության Շիրակի մարզի «Կումայրի» բաժին: Ինձ տեղեկացրել են, որ Հայաստանում հայտարարված ռազմական դրության պայմաններում, ֆեյսբուքում արված իմ գրառումների պատճառով, պետք է տուգանվեմ 300.000 դրամով: Ընդ որում, նախորդ օրն մեր տուն եկած ոստիկանների ներկայությամբ, ջնջել էի այդ երկու՝ իշխանությունների ստախոսության վերաբերյալ, իմ կարծիքն արտահայտող գրառումները: Արձանագրությունը կից ուղարկում եմ: Սակայն այդ ամենը բավարար չէր Նիկոլ Փաշինյանի գրպանային ոստիկանների համար:

2021 թվականի նոյեմբերի 11-ին՝ այդ տուգանքի կտրոնը ինձ ուղարկելուց մեկ տարի անց, ստացել եմ ՀՀ հարկադիր կատարում ապահովող ծառայության Շիրակի մարզային բաժնի որոշումը՝ ինձանից բռնագանձելու 300.000+5% դրամ որոշումը: Բողոքարկել եմ, սակայն՝ անօգուտ:

Դեմոկրատիայի հովանոցի տակ իշխանության եկած, ֆյուրերական որակներ ունեցող Փաշինյանի ղեկավարած երկրում խոսքի ազատությունը, կարծիք հայտնելը քրեորեն պատժելի է դարձել:

2020 թվականի դեկտեմբերից մինչև 2022 թվականի փետրվար ամիսը, դիմումներ եմ հղել ՀՀ ոստիկանությանը՝ պահանջելով իմ «պատժելի» գրառումները: Չէին տրամադրում: Միայն այն բանից հետո, երբ իմ դիմումում հիշատակեցի ՀՀ-ում ԱՄՆ և ՀՀ-ում Եվրամիության դեսպանների անունները, որոնց պատրաստվում էի դիմել նաև այդ հարցով, 04.03.2022 թվականին՝ էլեկտրոնային տարբերակով, ստացա այդ գրառումները:

Ահա, այսպիսին է ժողովրդավարությունը մեր երկրում: Փաստորեն, միայն այդ դեսպանների անունները տալուց հետո, ոստիկանությունն որոշեց օրենքի պահանջը կատարել:

Հարգելի դեսպաններ

Ուզում եմ տեղեկացնել, որ ինձ ապօրինաբար տուգանել են իմ երկու գրառման համար, որոնք, ինչպես նշեցի, հեռացրել էի: Սակայն Նիկոլ Փաշինյանի ծառա ոստիկանները, որոնց համար մարդու վրա գործ սարքելը , թերևս, հիմնական առաքելությունն է, որոշել են իմ՝ ևս երկու գրառում համարել հակաիշխանական: Նախ, ասեմ, որ ես իմ գրառումներից չեմ հրաժարվում: Դրանք իմ կարծիքներն են մեր երկրում՝ պատերազմական օրերին տիրող ստի, կեղծիքի, ազգին խաբելու և մոլորեցնելու վերաբերյալ:

Երկրորդ.

այս դիմումին կից ձեզ ներկայացվող այդ գրառումները որևէ հանցավոր միտք, կարծիք, կոնտենտ չեն բովանդակել: Դրանք ընդամենը բացահայտել են Նիկոլ Փաշինյանի ստի ֆաբրիկայի «արտադրանքը»: Ավելին, իմ գրառումները բովանդակել են նաև առաջարկներ՝ հստակ և կոնկրետ: Թե ինչի՞ համար է ՀՀ վարչապետի աթոռում հայտված անձը, որոշել վենդետա իրականացնել ազատ քաղաքացուս ազատ կարծիքի նկատմամբ, պարզ չէ:

Ինձ տուգանելը և բազմաթիվ այլ անձանց նկատմամբ տեղի ունեցող աղաղակող ռեպրեսիաները,մարդու իրավունքների խախտումները Հայաստանում անցել են կրիտիկական շեմը: Տուգանել, բանտ ուղարկել,սպառնալ, հայհոյել, ճնշել՝ սա է Հայաստանի այսօրվա իշխանության վարքագիծը:

Հարգարաժան դեսպաններ

Դիմելով Ձեզ՝ հարց եմ ուղղում. մարդու, խոսքի ազատության վրա հարձակումները ձեզ համար անընդունելի են միայն մե՞կ երկրում:

Երկրորդ.

Ինչո՞ւ դուք որևէ կերպ չեք դատապարտում, վերաբերմունք չեք արտահայտում Նիկոլ Փաշինյանի ստեղծած իրավական վակխանալիայի, մարդու իրավուքնների,
խոսքի, կարծիքի, այլ միտք ունեցող անձանց դեմ սանձազերված հարձակումների վերաբերյալ:

Ինչո՞ւ եք դուք տեսնում միայն այն, ինչը ձեր ատելության թիրախում է:

Ի՞նչ է, Նիկոլ Փաշինյանի բռնապետական արշավը մարդու իրավունքների, խոսքի ազատության դեմ նենգ հալածանքները, հետապնդումները նրան գովելու առի՞թ են: Ընդ որում, Նիկոլ Փաշինյանի ռեպրեսիվ, բերան փակելու փայտիկը իջնում է ոչ միայն լրագրողական կազմակերպությունների, այլև շարքային քաղաքացիների գլխին:

Հայաստանում տիրում է իրավական սադիզմի մթնոլորտ, իսկ դուք սեկելտիվ վերաբերմունք եք դրսևորում այն ղեկավարների և երկրների նկատմամբ, որոնց ուզում եք պատժել: Դա ժողովրդավարության՝ բամբակով փաթեթավորված դաշույ՞ն է:

Հարգելի տիկնայք

Քանի որ ձեր կողմից բարձր գնահատականի է արժանանում Նիկոլ Փաշինյանի ժողովրդավարությունը և, հաշվի առնելով այն իրողությունը, որ ես հենց նրա իշխանության օրոք եմ տուգանվել իմ կարծիքը՝ ռազմական դրության պայմաններում, արտահայտնելու համար,ապա խնդրում եմ ձեզ՝ վճարել Նիկոլ Փաշինյանի կողմից ինձ վրա դրված տուգանքը՝ 300.000 դրամը: Ես գործազուրկ, բայց անկախ կարծիք արտահայտող ՀՀ քաղաքացի եմ:

Այս դիմումին կից ուղարկում եմ իմ ֆեյսբուքյան գրառումները, որոնցից ազդվել է Նիկոլ Փաշինյանի ոստիկանությունը, ինչպես նաև իմ հրապարակումներից մեկը»։