Հնարավոր է՝ հավի միսն ու հավկիթն ավելի թանկանան. «Թռչնաբույծների ֆեդերացիայի» նախագահ (տեսանյութ)

Վիճակն իսկապես անորոշ է թռչնաբուծության ոլորտում, բայց հաշվի առնենք, որ հունվարին մենք ձվի գերարտադրություն ունեցանք և, եթե հիշում եք, ինքնարժեքից ցածր գին ուներ։ Այս մասին այսօր՝ մարտի 18-ին, ԱԺ հանձնաժողովների փակ նիստից հետո լրագրողների հետ զրույցում նշեց «Թռչնաբույծների ֆեդերացիայի» նախագահ Սերգեյ Ստեփանյանը:

Նա նկատեց, որ հիմա ձգտում են կայունացնել գները։ Թե ձուն ինչ գին կունենա Զատիկին՝ նա դժվարանում է ասել, բայց նշում է, որ ամեն ինչ անում են, որ թե՛ սպառողը, թե՛ արտադրողը չտուժեն։

«Բնականաբար, բոլորս էլ սպառող ենք, ձգտում ենք, որ օպտիմալ գնի վրա շուկա մտնենք, իրացում կազմակերպենք, որ մեր սպառողներին շատ չանհանգստացնենք, դժգոհություն չառաջացնենք»,- ասաց նա:

Ըստ Ստեփանյանի՝ վերջին շաբաթում ամբողջ արտադրությունը կախված է ներկրումից։ Նա ասաց, որ տարեկան օգտագործում են140-150 հազար տոննա համակցված կեր, ամսվա կտրվածքով՝ 350-400 տոննա, դրա մոտ 80 տոկոսը հատիկավոր ֆուրաժ է, որն ամբողջությամբ ներկրվում է ՌԴ-ից ու Ուկրաինայից:

Բայց արդեն 14 օր է՝ Լարսում մոտ 30 մեքենա կեր չի կարողանում հասնել Հայաստան: Սերգեյ Ստեփանյանը նկատում է, որ 2 օր առաջ էլ նույնիսկ հետ են տվել մեքենաները, գնացել, դատարկել են՝ արգելքի պատճառով:

«Այսինքն՝ այնտեղ էլ է անորոշություն: Հստակ չեն տիրապետում, թե սահմանափակումներն ինչին են վերաբերում: Մենք ստիպված պատրաստի համակցված կեր գնեցինք, ինչը մեր ծախսերը 30-35 տոկոսով ավելացնում է: Սա նշանակում է, որ մենք չենք կարողանում նույնիսկ ընթացիկ ինքնարժեք ունենալ կամ ծրագրավորել», - ասաց Սերգեյ Ստեփանյանը:

Նա նաև նշեց, որ այսօր արտադրողներն ունեն մեկ շաբաթվա պահուստային կեր, խոշոր կեր արտադրողների պաշարները կազմում են 1-1,5 ամիս:

«Այստեղ ամենից շատ կտուժեն նրանք, ովքեր պաշարներ չունեն, իսկ պաշարներ չունեն փոքր ու միջին ընկերությունները»,- ասաց նա:

Հարցին՝ այդ ընկերությունները փակվելո՞ւ են, Ստեփանյանն արձագանքեց. «Ես չէի ուզում այդ խոսքն ասել: Մենք այդ փորձն ունենք»:

Հարցին, թե քանի՞սն են փակվելու վտանգի առջև, նա պատասխանեց. «Դժվար հարց եք տալիս: Ես չեմ ուզում հուսախաբ անել այն ֆերմերներին, որոնք հույս ունեն, որ չեն փակվի և կշարունակեն գործել: Մոտավորապես 56 ոչ մասնագիտացված ֆերմերային տնտեսություններ ունենք: Ընդհանուր առմամբ, ունենք մասնագիտացված ձու արտադրող 10-11 ընկերություն և միս արտադրող 8 խոշոր ընկերություններ: Հիմնական կերը նրանք են օգտագործում: Նրանց կարիքները գնում են զրոյական վիճակի: Օրերի հարց է, մենք սպասում ենք, որ գոնե երկուշաբթի պետք է կարգավորվի հարց: Այսինքն՝ մեր և Ռուսաստանի պատվիրակությունները պետք է հանդիպեն, մերոնք փաթեթ են ներկայացրել, և հուսադրող բան կա, որ ՌԴ-ն մեր պահանջարկը կբավարարի: Բայց չի բավարարի դրանից ավելի պահանջարկ՝ մտավախություն ունենալով, որ ռեէքսպորտ կարող է կազմակերպվել: Կառավարությունից ասել են, որ դրական ազդակներ կան։ Հույսներս չենք կորցնում: Վատթարագույնն այն է, որ ստիպված պարտադիր մորթ կազմակերպենք»,- ասաց «Թռչնաբույծների ֆեդերացիայի» նախագահը։