Ուկրաինայում երբեք հակահայկական բաներ չեն եղել. հարգանքով եմ լցված այդ ժողովրդի հանդեպ. Հրանտ Բագրատյան

Օր առաջ, ժամ առաջ պատերազմի դադարեցումը շահավետ է և՛ Ուկրաինայի, և՛ Ռուսաստանի համար: Բայց այստեղ կա մի խառնակիչ գործոն՝ Արևմուտքը, որովհետև հանձին Ուկրաինայի նախագահի, նա գտել է մեկին, որի հետ որևէ բան հնարավոր չի լինում պայմանավորվել: Այս մասին այսօր «Հայելի» ակումբում հրավիրված ասուլիսի ժամանակ ասաց ՀՀ նախկին վարչապետ Հրանտ Բագրատյանը:

«Իր սեփական երկրի դժբախտությունը դիտարկվում է նրա (Ուկարաինայի նախագահ Զելենսկիի-հեղ․) փառահեղության, փառասիրության բավարարման աղբյուր: Անգամ նրան խոստացել են ներկայացնել Խաղաղության Նոբելյան մրցանակին: Ռուսները բերում են փաստեր, որ, եղբա՛յր, եթե մենք չհարձակվեինք, ապա դու հարձակվելու էիր Դոնբասի վրա. և դա ճիշտ է: Արևմուտքը տեսնում է, որ զորքը շարել են, ու եթե հարձակվեն Դոնբասի վրա, ապա Պուտինը կպատասխանի, սակայն նույն Արևմուտքը չէր տեսնում, որ Դոնբասի արևմտյան կողմից շարված էր ուկրաինական բանակը:  Ես ցավում եմ շատ, բայց միևնույն ժամանակ սխալ եմ համարում ուկրաինական ժողովրդին՝ բոլորին նացիստ համարելը: Հարգանքով եմ լցված այդ ժողովրդի հանդեպ: Մեր ժողովրդի պատմական հատվածը միշտ, առանդ բացառության նրանց մոտ գտել է արժանի ընդունելություն»,- ասաց Բագրատյանը:

Նրա խոսքով՝ Ուկրաինայում երբեք հակահայկական բաներ չեն եղել՝ շուրջ 500-600 տարվա պատմության մեջ:

«Եվ ուրեմն՝ ցանկանանք, որ այդտեղ շուտափույթ խաղաղություն լինի: Իհարկե, ռուսական զորքը մեթոդապես ճնշում է»,-ասաց Բագրատյանը: