Ադրբեջանի «պատմական հողերի» «ազատագրմամբ» դադարեցվեց «Հայաստանի ռազմական ագրեսիան» Ադրբեջանի դեմ․ Ալիևի զառանցանքները՝ Բայդենին ուղղված նամակում

«Վերջին 30 տարվա ընթացքում Ադրբեջանի և Ամերիկայի Միացյալ Նահանգների միջև հաջող երկկողմ հարաբերություններ են ձևավորվել։ Այս ընթացքում մեր բազմակողմ արդյունավետ գործունեությունն ուղեկցվել է փոխադարձ ներդրումներով, ձեր երկիրը ներկայացնող հարյուրավոր ընկերությունների ակտիվ մասնակցությամբ Ադրբեջանի տնտեսական կյանքում»։ AzerTAc-ի փոխանցմամբ՝ այս մասին ասվում է Ադրբեջանի նախագահ Իլհամ Ալիևի՝ ԱՄՆ նախագահ Ջոզեֆ Բայդենին ուղարկված նամակում։

Նամակում Իլհամ Ալիևը շնորհակալություն է հայտնել ԱՄՆ նախագահին Նովրուզի տոնի կապակցությամբ շնորհավորական նամակի և բարի խոսքերի համար։

«Այսօր Ադրբեջանի Հանրապետությունը անկախ քաղաքականություն վարող պետություն է՝ հիմնված ժողովրդի կամքի և շահերի վրա։ Ադրբեջանի «պատմական հողերի» «ազատագրմամբ» դադարեցվեց «Հայաստանի ռազմական ագրեսիան» Ադրբեջանի դեմ, որը տևեց գրեթե երեսուն տարի, և մեր երկիրը կատարեց ՄԱԿ-ի Անվտանգության խորհրդի համապատասխան որոշումները, որոնք անկատար մնացին շուրջ 30 տարի։ Որպես «խաղաղության կողմնակիցներ»՝ մենք պատրաստ ենք Հայաստանի հետ բանակցություններ սկսել խաղաղության համաձայնագրի շուրջ՝ հիմնված միջազգային իրավունքի հիմնարար սկզբունքների վրա, ինչպիսիք են մեր երկրի միջազգայնորեն ճանաչված սահմանների տարածքային ամբողջականությունը, ինքնիշխանությունը և անձեռնմխելիությունը։ Մենք հուսով ենք, որ Միացյալ Նահանգները կաջակցի Ադրբեջանի խաղաղության օրակարգին՝ հիմնված ապագայի տեսլականի վրա,- նշել է Ալիևը։