Սիրելի տավուշցիներ, կարո՞ղ էինք պատկերացնել, որ գալու է մի օր, որ փորձելու են ինչ-որ հիմնավորումներ բերել, թե Տավուշի այս կամ այն գյուղն ադրբեջանական է. Մանուկյան
«Իրականում այս նախագիծը մի քիչ խելագարության կանխավարկածից է. թե կարո՞ղ է պատահել արդյոք Հայաստանում, որ որևէ մեկը մեր տարածքային ամբողջականության, մեր ինքնիշխանության դեմ հրապարակային արտահայտություն անի, ելույթ ունենա: Անդրադառնալով քննարկվող նախագծին, որով քրեական պատասխանատվություն է սահմանվում երկրի տարածքային ամբողջականությունը կասկածի տակ դնողի, քարոզողի համար, այս մասին ասաց «Հայաստան» խմբակցության պատգամավոր, ՀՅԴ-ական Գեղամ Մանուկյանը:
Նա նկատեց, որ կա մի ձևակերպում՝ օվերտոնի պատուհան, երբ անընդունելի գաղափարը սկսում է քննարկվել: Երկար քննարկվելով վերջում արդեն դառնում է հանրային տրամադրություն:
Ըստ Գեղամ Մանուկյանի՝ մի քանի տարի առաջ կարելի էր ասել, որ նման նախագծի իմաստը չկա, բայց օվերտոնի պատուհանով այսօր Հայաստանում ազատ քննարկման առարկա է դառնում Արցախի ինքնիշխանությունը:
«3 տարի առաջ կմտածեի՞ր, որ ԱԺ պատգամավորը կարող է իրեն թույլ տալ կասկածի տակ դնել Արցախի ինքնիշխանությունը, ամենավերջին թրքաբարո ձևով արցախուն վիրավորել:
Կարո՞ղ էինք պատկերացնել, որ այսօր վարչապետի պաշտոնը զբաղեցնող անձն իր հայտարարություններով կասկածի տակ դնի ՀՀ պարտականությունը՝ ցեղասպանության միջազգային ճանաչման օգտին:
Սիրելի տավուշցիներ, կարո՞ղ էինք պատկերացնել, որ գալու է մի օր, որ ԱԺ պատգամավորները փորձելու են ինչ-որ հիմնավորումներ բերել, որ Տավուշի այս կամ այն գյուղն ադրբեջանական է: Այս ամենի համար է այս օրենքը: Այս բոլոր փաստերը գալիս են ասելու, որ քանի դեռ այս քաղաքական մեծամասնությունը կա, ամեն ինչ սպասելի է»,-ասաց Մանուկյանը:
