Գյուղապետը բարեկամ լինի, էս պահին կուշտ լինեն, մի երկու կոպեկ փող աշխատեն` հերիք ա. հասարակության մի ստվար զանգված խորը դեգրադացված է

«Ճիշտն ասած ես կզարմանայի, եթե Վեդի համայնքի բնակչությունը երեկ «սխալ» ընտրություն կատարեր»։ Այս մասին ֆեյսբուքյան իր էջում գրել է Արման Դավթյանը։

«Ընդհանրապես Արարատի մարզի բնակչությունը միշտ էլ «ճիշտ» ընտրություն է կատարել։ Միշտ էլ` սկսած 1991թ-ից, իշխանությունը և նրա ներկայացուցիչները մարզում հաղթել են բոլոր տեսակի ընտրություններում` անկախ նրա թեկնածուի ով լինելը։ Միակ բացառությունը դա 2021թ. դեկտեմբերին Մասիս համայնքում Դավիթ Համբարձումյանի հաղթանակն էր, ինչը ես կապում եմ միայն Դավիթի անձի և նրա թիմի ճիշտ աշխատանքի հետ։

Իրականում ընդդիմությունը ճիշտ կանի փոխի իր մարտավարությունը բնակչության հետ աշխատելիս։ Հայրենիք, հող, Արցախ, բանակ, զոհեր` չեն անցնում նման հասկացողություններ։ Ներկա իշխանություններին փնովելն ու իրական դեմքը ցույց տալը նույնպես անիմաստ և անօգուտ զբաղմունք է։

«Նախկին, «ներկա» ձևաչափում մենք անզոր ենք էս իշխանությունների դեմ։ Բնակչության հետ պետք է շփվել իրենց ուղեղին, քիմքին, գրպանին, ստամոքսին հաճո թեմաներով, ԽԾԲ ձևաչափով, կամ վարչական լծակներով։

Մեր հասարակության մի ստվար զանգված խորը դեգրադացված է։ Եւ դա տեղի չի ունեցել հենց 2018թ. ապրիլին։ Դա տարիների «աշխատանքի» արդյունք է։ Մարդիկ չեն ընկալում մեր պետության հետ և շուրջ կատարվելիքի լրջության աստիճանը։

Գյուղապետը բարեկամ լինի, էս պահին կուշտ լինեն, մի երկու կոպեկ փող աշխատեն` հերիք ա։

Ինչ ասեմ` սա է մեր ունեցածը։

Ընկել ենք, ու դեռ երկար պիտի քաշենք...»: