Սպասում են բոլորս մեռնենք, որ փող չտան. ամբողջ աշխարհում չկա նման բան․ օդաչուները դեռ փոխհատուցում չեն ստացել (ֆոտո, վիդեո)

Հաշմանդամություն ձեռք բերած օդաչուներն արդեն15 տարի պահանջում են իրենց հասանելիք փոխհատուցումը, սակայն 0 արդյունք։

NEWSPRESS.am—ի հետ զրույցում օդաչուները նկատեցին, որ սկզբում իրենց թիվն անցել է 140-ից, սակայն նրանց շարքերն աստիճանաբար նոսրանում են։ Անցած շաբաթ էլ ևս 3 օդաչու է մահացել։ Հիմա մնացել են 29 մարդ։

Նրանցից 5-ն էլ այսօր՝ մարտի 31-ին եկել էին կառավարության դիմաց՝ պահանջելու իրենց փոխհատուցումը։ Անգամ որպես հիշատակ ցանկացան նկարվել միասին։

«Ամեն օր ցուցակն ենք ստուգում, տեսնենք՝ է՞լ ով մեռավ էսօր»,- մեզ հետ զրույցում ասաց հաշմանդամ օդաչուներից մեկը, ով չցանկացավ տեսանկարահանվել, քանի որ «խոսքը կոշտ» էր ստացվելու. «Էհ, էսքան տարի ասում ենք, ի՞նչ փոխվեց։ Հասկացող մարդկանց պետք է ասես»,- ասաց նա՝ հավելելով, թե երևի վարչապետը պետք է թոշակառու լինի, որ թոշակառուներին հասկանա։

ԻԼ-86-ի հրամանատար 74-ամյա Գագիկ Միրզոյանն էլ նկատեց, որ 2001-ին բոլոր օդաչուները զոհվել են աշխատանքի պահին, ինչը նշանակում է, որ պետությունը պարտավոր է մինչև չափահաս դառնալը դրամական օգնություն ցուցաբերել նրանց երեխաներին։ Սակայն այդպես էլ չեն տվել ոչինչ։

Ինչ վերաբերում է աշխատանքի ժամանակ վիրավորված օդաչուներին, ապա նրանք 2-րդ կարգի հաշմանդամներ են, ովքեր համապատասխան գործերով շահել են դատերը, բայց իրավունքները չեն վերականգնվել։

Բացի այդ, վերջերս ՀՀ Մարդու իրավունքների պաշտպանը Սահմանադրական դատարանին է ներկայացրել Հաշմանդամ օդաչուների հարցը, որի համաձայն՝ Հաշմանդամություն ստացած օդաչուները ՍԴ որոշմամբ ունեն աշխատավայրում կրած վնասի համար պետբյուջեի հաշվին փոխհատուցում ստանալու իրավունք․․․

Ունենալը՝ ունեն, սակայն օրենքը սողանցքներ ունի, որն էլ կառավարությունը օգտագործում է՝ պատասխանատվությունից ու փոխհատուցումը տրամադրելուց խուսափելու համար։

Նկատենք, որ օդաչուները մասնակցել են նաև Արցախյան պատերազմներին։

NEWSPRESS․am-ի զրույցը Գագիկ Միրզոյանի հետ տեսանյութով՝ ներկայացնում ենք ստորև․

Հիշեցնենք, որ 2001 թվականին Իրանում վթարի էր ենթարկվել հայկական ավիաուղիներին պատկանող 3ԱԿ-40 օդանավը, որի հետևանքով զոհվել էր 30 մարդ, այդ թվում Իրանի տրանսպորտի նախարարը, պատգամավորներ և ինքնաթիռի ողջ անձնակազմը: Զոհվածների թվում էին նաև 5 հայ օդաչուներ։