Այժմ ժամանակն է կարգավորելու Ադրբեջանի և Հայաստանի հարաբերությունները. Ալիև

«Հակամարտությունը լուծված է։ Ադրբեջանն ինքը դա արեց, և այժմ ժամանակն է կարգավորելու Ադրբեջանի և Հայաստանի հարաբերությունները։ Մենք որոշակի հաղորդագրություններ ենք ստանում հայ պաշտոնյաներից: Ինչպես վերջերս ինձ ասացին, այդ ուղերձներից մեկն այն է, որ նրանք կարծում են, որ մեր առաջարկն ընդունելի է։ Սա շատ լավ նորություն է, և ես հույս ունեմ, որ Բրյուսելում կայանալիք հանդիպումն էլ ավելի հստակություն կբերի այս հարցում»: Այս մասին նշել է Ադրբեջանի նախագահ Իլհամ Ալիևը ԵԱՀԿ-ի ղեկավարի հետ հանդիպման ժամանակ:

«Մեր ներկայացրած հինգ սկզբունքները արտացոլում են միջազգային իրավունքի նորմերը: Ինչպես ասում են՝ մենք այստեղ անիվը նոր չենք հորինում։ Այս բոլոր սկզբունքները ցանկացած երկրների միջպետական ​​հարաբերությունների հիմնարար սկզբունքներն են։ Տարածքային ամբողջականության և միջազգային սահմանների անձեռնմխելիության փոխադարձ ճանաչում, այնուհետև սահմանների սահմանազատում, ես հավատում եմ, որ դրա հիման վրա խաղաղություն կգա Կովկաս: Մենք դա ենք ուզում։ Մենք տեսնում ենք Հարավային Կովկասի երեք երկրների ակտիվ համագործակցության ներուժ, և կարծում եմ, որ դա կարևոր կլինի։ Իհարկե, այս բոլոր հարցերը պետք է լուծվեն շատ ուշադիր և ժամանակին»: