Ողբերգական ավտովթար՝ Շիրակի մարզում. բախվել են «Mercedes»-ն ու «07»-ը. կա 1 զոհ, 2 վիրավորներին հիվանդանոց են ուղեկցել ճանապարհային ոստիկանության ավագ տեսուչները

Այսօր՝ ապրիլի 1-ին, խոշոր ու ողբերգական ավտովթար է տեղի ունեցել Շիրակի մարզում: Ժամը 22:30-ի սահմաններում Երևան–Գյումրի ավտոճանապարհի 95-րդ կմ հատվածում՝ Սառնաղբյուր գյուղի վարչական տարածքում, բախվել են «Mercedes» և «ВАЗ 2107» մակնիշի ավտոմեքենաները:

 Ինչպես դեպքի վայրից հայտնում է Shamshyan.com-ը՝ վթարի հետևանքով 1 հոգի տեղում մահացել է, 2 հոգի քաղաքացիական ավտոմեքենաներով ճանապարհային ոստիկանության 2-րդ սպայական գումարտակի 2-րդ վաշտի 2-րդ դասակի ավագ տեսուչներ Ավետիք Քալաշյանի և Կարապետ Չալաբյանի ուղեկցությամբ տեղափոխվել են Գյումրու բժշկական կենտրոն:

Օպերատիվորեն ժամանել են նույն վաշտի հրամանատար Վաչե Մալաքյանն ու դասակի հրամանատար Լևոն Միքայելյանը:

Օպերատիվորեն ժամանել է նաև ոստիկանության Անիի բաժնի օպերատիվ խումբը՝ օրվա պատասխանատու հերթապահի գլխավորությամբ:

Վթարի մասին ՃՈ 177 օպերատիվ կառավարման կենտրոնի պատասխանատու հերթապահ Դավիթ Գրիգորյանը տեղեկությունը փոխանցել է Հայաստանի քննչական կոմիտեի Շիրակի մարզային քննչական վարչության Անիի քննչական բաժին, որտեղից ժամանել է քննչական խումբը՝ բաժնի պետի և հատկապես կարևոր գործերով ավագ քննիչի գլխավորությամբ:

Փաստի առթիվ քննչական բաժնում ՀՀ քր օր-ի 242 հոդվածի 2-րդ մասի հատկանիշներով հարուցվել է քրեական գործ:

Քննիչի հանձնարարականով ավտոմեքենաները տեղափոխվում են ոստիկանության Անիի բաժնի պահպանվող հատուկ տարածք:

Ոստիկանությունն ու քննչական բաժինը պարզում են մահացածի, վարորդների և վիրավորների ինքնությունը: