27 տարին լրացած քաղաքացիություն ստացող անձն էլ թող բարի լինի ու գա 1 ամիս ծառայի, ՀՀ-ն բոլորիս հայրենիքն է․ Հայկ Սարգսյան

ԱԺ Պաշտպանության և անվտանգության խորհրդում քննարկվում է «Պարտադիր զինվորական ծառայության մասին» օրենքում փոփոխություններ կատարելու մասին հարցը, որով առաջարկվում է պարտադիր զինվորական ծառայությունից ազատվելու հնարավորություն տալ պատերազմի ժամանակ զոհված զինծառայողների ընտանիքի անդամներին։ Հիմնական զեկուցող Հայկ Սարգսյանը ելույթի ժամանակ ասաց, որ Հայաստանում շատ երիտասարդներ չեն անցնում պարտադիր զինվորական ծառայություն՝ ուսման հանգամանքով պայմանավորված։

Սարգսյանի խոսքով՝ «Պատիվ ունեմ» խմբակցությունն առաջարկում է, որպեսզի ոչ թե նշված խմբին ազատենք պարտադիր զինվորական ծառայությունից, այլ Հայաստանի Հանրապետության պաշտպանության նախարարի հրամանով սահմանված կարգով զինվորական ծառայության անցկացնել նրանց Գլխավոր շտաբի կառուցվածքային ստորաբաժանումներում։ Սարգսյանը, սակայն, նշեց, որ առաջարկն իր կողմից չի ընդունվել, քանի որ, ի սկզբանե օրենսդրական նախաձեռնության նպատակն է եղել տվյալ ընտանիքներում ծառացած սոցիալական և հոգեբանական խնդիրներ լուծելը։ 

«Առաջարկել եմ, որպեսզի զոհված զինծառայողների որդիները և եղբայրներն ազատվեն պարտադիր զինվորական ծառայությունից, որպեսզի շարունակեն գտնվել իրենց ծնողների կողքին, որպեսզի նրանք կարողանան ավելի հեշտ հաղթահարել իրենց առաջ ծառացած սոցիալական խնդիրները, աշխատեն և պահեն իրենց ընտանիքը»,- նշեց Սարգսյանը։ 

Սարգսյանը նաև առաջարկեց այս համատեքստում քննարկել, որ մեկամսյա կամ երկամսյա ծառայության տանեն նաև 27 տարին լրացած ՀՀ քաղաքացիություն ստացող անձանց։

«Այսինքն՝ տղան ծնվել է ՌԴ-ում, սպասում է լրանա իր 27 տարին, նոր գալիս ստանում է ՀՀ քաղաքացիություն և ոչ մի օր չի ծառայում, մենք իրենց թողնում ենք ու զոհվածի եղբորը կամ որդուն ասում ենք՝ դու մի ազատվի, արի 6 ամսի ծառայի։ Թող բարի լինեն, գան մեկ ամիս ծառայեն, այդ համազգեստը հագնեն, ունենան բանակի ընկերներ ու հասկանան, որ ՀՀ-ն բոլորիս հայրենիքն է, հասկանան, որ ՀՀ անձնագրից ու բարիքներից օգտվելու համար պետք է ծառայություն մատուցել Հայաստանին»,- ասաց Հայկ Սարգսյանը։