Ըստ Ղազախստանի դեսպանի՝ հայ-ղազախական առևտուրը 2021-ին աճել է ավելի քան 30 տոկոսով

«ԵԱՏՄ զարգացման հնարավորությունները և հեռանկարները հավաքական Արևմուտքի կողմից Ռուսաստանին տնտեսական պատերազմ հայտարարելուց հետո» թեմայով կլոր սեղանի ընթացքում  Հայաստանում Ղազախստանի Հանրապետության արտակարգ և լիազոր դեսպան Բոլատ Իմանբաևը հայտարարել է՝ չնայած արտաքին գործոնների բացասական ազդեցությանը՝ ապրանքաշրջանառությունը Եվրասիական տնտեսական միության երկրների միջև դինամիկ աճ է արձանագրում:

Ղազախստանի դեսպանի կարծիքով՝ փոխշահավետ որոշումները համապատասխանում են ԵԱՏՄ-ի ոգուն, որն իր գոյության կարճ ժամանակահատվածում փոխադարձ առևտրի զգալի աճ է ցույց տվել մասնակից պետությունների միջև, միության շրջանակներում 2021 թ. արդյունքներով  արձանագրվել  է  ապրանքաշրջանառության աճի դինամիկա

«Չնայած արտաքին գործոններին և կարանտինային սահմանափակումներին՝ ԵԱՏՄ անդամ պետությունների հետ ղազախական առևտրի ծավալը աճել է 28 տոկոսով՝ հասնելով 26,1 մլրդ դոլարի ցուցանիշին: Ընդ որում, Ղազախստան-Հայաստան երկկողմ առևտրաշրջանառությունը նշված շրջանում աճել է ավելի քան 30 տոկոսով», – հայտնեց Ղազախստանի դեսպանը:

Նախորդ տարի ԵԱՏՄ մարմիններում նախագահած պետության դեսպանը  հիշեցնոմ է՝ Ղազախստանի նախագահ Կասիմ-Ժոմարտ Տոկաևը մարտի 16-ին հանդես էր եկել ուղերձով, որը կրում էր «Նոր Ղազախստան. նորացման և արդիականացման ճանապարհը» խորագիրը: Երկիրը թևակոխում է զարգացման նոր շրջափուլ, որում Ղազախստանի ղեկավարը մեծ կարևորություն է տալիս արտաքին գործոններին և աշխարհաքաղաքական իրավիճակին: Ըստ Տոկաևի՝ ընթացիկ միջազգային իրադրությունը իր լարվածությամբ, Արևմուտքի և Ռուսաստանի միջև տնտեսական ու քաղաքական կոշտ դիմակայությամբ և ամբողջ աշխարհի համար անկանխատեսելի հետևանքներով աննախադեպ է, և այդ պատճառով Ղազախստանի կառավարությանն առընթեր ստեղծվել է օպերատիվ շտաբ՝ ստեղծված իրավիճակին օպերատիվ կերպով արձագանքելու համար:

Այս համատեքստում ինչպես Ղազախստանի, այնպես էլ Ռուսաստանի դեսպանները ընդգծում են եվրասիական փոխգործակցության և ի հայտ եկած նոր ծանր մարտահրավերները ԵԱՏՄ երկրների կողմից միասնական ջանքերով հաղթահարելու անհրաժեշտությունը: