Բուսական յուղերի վաճառքը սահմանափակող ցուցանակներ՝ բրիտանական խանութներում

Բրիտանական Waitrose սուպերմարկետների ցանցը սահմանափակել է ձեթի վաճառքը՝ Ուկրաինայում իրավիճակի հետ կապված դեֆիցիտի պատճառով:

 «ՌԻԱ ՆովոստիԻ փոխանցմամբ, Daily Mail-ը գրում է՝ Waitrose խանութներում հայտնվել են  բոլոր տեսակի բուսական յուղերի վաճառքը սահմանափակող ցուցանակներ:

«Մենք ցանկանում ենք այնպես անել, որ մեր բոլոր հաճախորդները կարողանան գնել բուսական յուղ, ուստի խնդրում ենք, որ նրանցից յուրաքանչյուրը գնի ոչ ավելի քան երկու շիշ», – ասել է սուպերմարկետների ցանցի ներկայացուցիչը:

Մեկ այլ խոշոր սուպերմարկետների ցանց՝ Sainsbury’s-ը, իր խանութներում փակցրել է ցուցանակներ և  նախազգուշացրել գնորդներին՝  որոշ ապրանքատեսակների մեջ արևածաղկի ձեթը կարող է փոխարինվել ռապսի ձեթով:

Նշենք՝  Մեծ Բրիտանիայի բուսական յուղի խոշորագույն արտադրողը՝ Edible Oils-ը, անցյալ շաբաթ նախազգուշացրել էր, որ Մեծ Բրիտանիային մնացել է ընդամենը մի քանի շաբաթվա արևածաղկի ձեթ՝ սպառման համար:

Բացի այդ, Walkers չիպսեր արտադրող PepsiCo ընկերությունը տեղեկացրել էր, որ իր չիպսերի մեջ ժամանակավորապես կօգտագործվի կանոլայի յուղ՝ արևածաղկի ձեթի փոխարեն: