Այս օրենքից հետո բուքմեյքերական գրասենյակները կփակվեն․ Գևորգ Պապոյան

Երբ խոսում ենք բանկային հաշիվների մասին, բուքմեյքերական հաշիվ ունենալու համար անձի չափահաս լինելը պարտադիր է, մյուս կողմից բանկային հաշիվ ունենալու համար ևա կա որոշակի տարիքային շեմ, հետևաբար անչափահասների մասնակցությունը հնարավոր չի լինելու, իսկ եթե խաղան այլ, օրինակ ծնողերի քարտային հաշիվներով, դա վերահսկելի կդառնա։ Այս մասին այսօր ԱԺ-ում ասաց «Քաղաքացիական պայմանագիր» խմբակցության պատգամավոր Գևորգ Պապոյանը՝ նշյալ խմբակցության պատգամավորների ներկայացրած օրենքի նախագիծը, որն առաջարկում է արգելել կանխիկ եղանակով, այդ թվում՝ վճարային տերմինալների միջոցով խաղադրույքների իրականացումը, օրենքն ուժի մեջ մտնելուց 6 ամիս անց կարգելվի նաև խաղադրույքների իրականացումը էլեկտրոնային դրամապանակների միջոցով:

«Քաղաքացիական պայմանագիր» խմբակցության պատգամավոր Սերգեյ Բագրատյանի հարցին, թե կան գործիքակազմեր քաղաքացիների կողմից ապառիկ եղանակով կանխիկ խաղադրույքներ անելը կանխելու համար, Պապոյանն ասաց․ «Եթե կանխիկը վերացնում ենք, ապա, բնականաբար, ապառիկ կանխիկն էլ չի լինի այս պարագայում»։

Պապոյանի խոսքով՝ այս օրենքի նախագիծն ընդունելուց հետո կփակվեն բուքմեյքերական գրասենյակներ կոչվածները, որոնք նպատակ ունեն կանխիկ խաղադրույքներ ընդունելու, հիմա, եթե կանխիկ խաղադրույքն արգելված է, այդ գրասենյակների մեծ մասը փակվելու են, որովհետև նրանց գոյությունն իմաստազրկվելու է։