Վարշամ Ղարիբյանը նվիրել է Վրեժ Մարկոսյանին, Վրեժ Մարկոսյանը՝ Աղվան Հովսեփյանի որդուն. մանրամասներ

«Հրապարակ» թերթը գրում է.

«Հայաստանի նախկին գլխավոր դատախազ, Քննչական կոմիտեի նախկին նախագահ Աղվան Հովսեփյանի վերաբերյալ քրեական գործի նախաքննությունն ավարտվել է․ այս մասին հայտնում է Հակակոռուպցիոն կոմիտեն՝ նշելով, որ Հովսեփյանը մեղադրվում է ձեռնարկատիրական գործունեությանն ապօրինի մասնակցելու, առանձնապես խոշոր չափերով կաշառք ստանալու, փողերի լվացման եւ այլ չարաշահումների կատարման մեջ։

Կոմիտեն մի հսկայածավալ տեքստ է հրապարակել՝ Աղվան Հովսեփյանին ներկայացված մեղադրանքների վերաբերյալ։ Գործում բազմաթիվ դրվագներ են ներկայացված․ մեկը վերաբերում է ձեռնարկությունների կառավարմանն ապօրինաբար մասնակցելուն, մյուսը՝ որդուն՝ Նարեկ Հովսեփյանին, «Տրանս-Սիստեմ»-ի 100 տոկոսի սեփականատեր դարձնելուն, ՀԷԿ-երին՝ լիցենզիա ստանալու հարցում օգնելուն, կապերն ու պաշտոնն օգտագործելով՝ մի շարք գործեր կատարելուն։

Դրվագներից մեկն էլ վերաբերում է «Տիգրան Մեծ» հրատարակչության գլխավոր տնօրեն Վրեժ Մարկոսյանի մասնակցությանը։ Նա, ըստ Հակակոռուպցիոն կոմիտեի, մեղադրվում է Աղվան Հովսեփյանի դրդմամբ անհատույց օտարման եղանակով Վարշամ Ղարիբյանին (հայտնի Ղարիբյան եղբայրներից մեկը) փաստացի պատկանող հողատարածքը վատնման եղանակով` նվիրատվության պայմանագրով, 2017-ին Աղվան Հովսեփյանի որդու՝ Նարեկ Հովսեփյանի անվամբ գրանցելու համար։ Մարկոսյանի նկատմամբ որպես խափանման միջոց է ընտրվել ստորագրություն չհեռանալու մասին:

Հիշեցնենք․ ապարանյան ծագումով Ղարիբյան եղբայրները, որոնք հայտնի են հատկապես «Շանթ» ընկերությամբ, համատեղ հիմնադրել եւ կառավարում էին «Շանթ» եւ «Եվրովագեն» ընկերությունները, «Շանթ» ռեստորանը, տարիներ առաջ գժտվեցին, նրանց ներընտանեկան վեճը դարձավ հանրության սեփականությունը, ընկան դատարաններ եւ անգամ միմյանց նկատմամբ մահափորձեր ձեռնարկեցին: Եղբայրներից մեկին հովանավորում էր Աղվան Հովսեփյանը, իսկ մյուսը հայտնվել էր ճամբարի հակառակ կողմում եւ թշնամացել ոչ միայն սեփական եղբոր, այլեւ այն ժամանակվա ամենահզոր մարդկանցից մեկի՝ Աղվան Հովսեփյանի հետ։

Բնականաբար, Աղվան Գառնիկիչը գործադրել էր իր ունեցած բոլոր լծակները եւ անհնազանդ Ղարիբյանին գցել իրավապահների մամլիչի տակ, հասցրել սնանկության, մյուս եղբորը հնարավորություն տվել, որ խլի վերջինիս ունեցվածքը եւ այլն։ Այդ շրջանում մենք բազմաթիվ հրապարակումներ ենք արել եւ ներկայացրել իրողությունը, որ Աղվան Հովսեփյանը Ղարիբյանների համասեփականատերն էր, ով տարիներ շարունակ աջակցել էր Ղարիբյանների բիզնեսին, նաեւ գումար ներդրել, եւ վեճը ծագել էր այն պահին, երբ դատախազի չգրանցված սեփականությունը եղբայրներից մեկը որոշել էր «պրիզնատ» չգալ, մյուսը «պրիզնատ» էր եկել, եւ Ղարիբյանների ընտանիքում արյան գետեր էին հոսում:

Այդ տարիներին անգամ գրվեց, որ ծնողներից մեկը հայտնվել էր մի եղբոր տանը, մյուսը՝ մյուս եղբոր, եւ նրանք իրար հետ չէին շփվում, անգամ միմյանց թաղումներին չէին մասնակցում։ Երբ 2018 թվականին իշխանափոխություն եղավ, տուժած եղբայրը՝ Վարշամ Ղարիբյանը, որոշեց, որ եկել է ռեւանշի ժամանակը, եւ դիմեց նոր իշխանություններին՝ բողոքելով Աղվան Հովսեփյանի դեմ։

Ճիշտ է՝ երկար ժամանակ Աղվան Գառնիկիչի դեմ գործ չէին հարուցում․ չար լեզուներն ասում էին, որ նա ամեն կերպ աջակցում է Փաշինյանի իրավապահներին, որ նախկին իշխանությունների դեմ քրեական գործեր հարուցվեն, բայց, հավանաբար, ինչ-որ պահի այդ լիմիտը սպառվեց, Աղվան Հովսեփյանին չպատժելու իմաստը վերացավ, եւ հարուցվեց քրեական գործ։ Նրան կալանավորեցին՝ շատերին մեծ բավականություն պատճառելով, քանզի նախկին դատախազը մեծ թվով թշնամիներ ուներ երկրում։

Սակայն այս պատմության մեջ ամենողբերգականը նախկին պատգամավոր, «Նիգ-Ապարան» հայրենակցական միության նախկին նախագահ Վրեժ Մարկոսյանի վիճակն է, ով տեւական ժամանակ է՝ հիվանդ է եւ հայտնվել է իրավապահների տեսադաշտում բացառապես Աղվան Հովսեփյանի հետ ունեցած մտերմության պատճառով։

Մեզ հետ զրույցում անդրադառնալով իրեն առաջադրված մեղադրանքին՝ Մարկոսյանը նշեց, որ այն չի ընդունում։ «Այդ տարածքն ինձ նվեր են տվել, ես հետո նվեր եմ տվել այդ մարդու տղուն՝ 7-8 տարի հետո։ Ինձ նվեր տվել էր այդ տարածքը Վարշամ Ղարիբյանը, ես էլ նվիրել եմ Հովսեփյանի որդուն․․․ Ոնց ինձ էին տվել, նույնն էլ ես եմ նվիրել»։

- Ձեզ ինչի՞ համար էին նվիրել։

- Ապարանցիների նախագահն էի այդ ժամանակ։

- Իսկ ինչո՞ւ նվերը նվեր տվեցիք։

- Որովհետեւ իմ ընկերոջ տղան է, այդ պատճառով։

- Առերեսում արվե՞լ է Ձեր եւ Աղվան Հովսեփյանի միջեւ։

- Հարցաքննվել եմ, բայց առերեսում չի եղել։

- Պարոն Մարկոսյան, հանցագործության մասին հաղորդում ներկայացրել է հենց Վարշամ Ղարիբյանը, ով, փաստորեն, տարիներ առաջ այդ տարածքը նվիրաբերել է Ձեզ։ Նվիրել է եւ հիմա հաղորդո՞ւմ է ներկայացրել։

- Ես շա՞տ գիտեմ, թող չգնար չտար։

- Դուք փաստաթղթեր ունե՞ք, որ Ձեզ նվիրաբերել են այդ տարածքը։

- Բա ո՜ նց, ունեմ, չէ՞, որ մի քանի տարի հետո տվել եմ։ Դրանից հետո Վարշամ Ղարիբյանի հետ հանդիպել ենք՝ մի 3 տարի, չի ուզել։ Բողոքել է՝ իրեն հարցրեք։

- Իր հետ խոսե՞լ եք այդ հաղորդումը ներկայացնելուց հետո։

- Ոչ։

- Իսկ, առհասարակ, Աղվան Հովսեփյանին առաջադրված մեղադրանքների վերաբերյալ ի՞նչ կարող եք ասել։

- Ոչ մի բան չեմ կարող ասել, չեմ հասկանում այդ իրավաբանությունից։

- Հովսեփյանի հետ Ձեր ընկերությունը շարունակվո՞ւմ է։

- Այո»:

Առավել մանրամասն՝ թերթի այսօրվա համարում