Շուշիի, Հադրութի հարցը երբեք, երբե՛ք չի եղել բանակցային սեղանին. Հայկ Մամիջանյան

Եթե Փաշինյանը փորձում է իր մեղքը գցել որևէ մեկի գրպանը, ապա թող հստակ ասի, թե միջազգային հանրություն ասելով՝ ում նկատի ունի։ Այս մասին ԱԺ ճեպազրույցի ժամանակ ասաց ԱԺ «Պատիվ ունեմ» խմբակցության պատգամավոր Հայկ Մամիջանյանը՝ անդրադառնալով Նիկոլ Փաշինյանի այն հայտարարությանը, թե իբր միջազգային հանրությունն է պահանջում «իջեցնել նշաձողը» Ղարաբաղի հարցում։

«Էդ ո՞նց է ստացվում, որ տարիներ շարունակ միջազգային հանրությունը հայկական կողմի մոտեցումների հետ համակարծիք էր, իսկ Փաշինյան-բանակցողի դեպքում պահանջում է իջեցնել նշաձողը»,- ասաց Մամիջանյանը՝ նշելով, որ կա՛մ Փաշինյանը սուտ է ասում, կա՛մ նրա պատկերացրած միջազգային հանրությունն ուրիշ է։

Ինչ վերաբերում է Փաշինյանի մյուս հայտարարությանը, թե նույնը կլիներ իրավիճակը՝ անգամ առանց պատերազմի ու զոհերի, Հայկ Մամիջանյանը դարձյալ սուտ է համարում՝ ընդգծելով, որ Շուշիի, Հադրութի հարցը երբեք չի եղել բանակցային սեղանին։

Նա նաև նկատեց, որ իշխանությունները ստում են, թե մանդատ ունեն բանակցելու։

«Սուտ է․ իրենք չունեն մանդատ Արցախն Ադրբեջանի կազմ տանելու։ Իրենք մանդատ են ստացել խաբեությամբ ու հիմա խոսում են այլ բանակցային տրամադրությամբ»,- ասաց Մամիջանյանը։

Նա հիշեցրեց, որ երբ Հովիկ Աղազարյանը կոչ արեց ևս մեկ անգամ գնալ ընտրության՝ խորհրդարանական մեծամասնությունը դահլիճից բացասական արձագանքեր հնչեցրեց։