Ռոստոմյանը վերադառնում է` «կեպկայի» վրա դեռ առանց «դուխով» դաջվածքի, բայց Փաշինյանի «դաբրո»-ով

Հայաստանի ազգային օլիմպիական կոմիտեի (ՀԱՕԿ) գլխավոր քարտուղար Հրաչյա Ռոստոմյանը իր էջում մի լուսանկար է հրապարակել՝ հետևյալ մակագրությամբ՝ «Վերադարձ»...

Ռոստոմյանն այս լուսանկարում հիշեցնում է «քայլիստներին»` կիսաթրաշով ու «կեպկայով»։ Ճիշտ է, նրա «կեպկայի» վրա չկա «դուխով»  դաջվածքը, բայց նկարից երևում է, որ նրան ինչ֊որ մեկը թևեր է տվել։

Իհարկե, հատկապես վերջին շրջանի առնետավազքը հաշվի առնելով, դժվար չէ կռահել, որ ԲՀԿ առաջնորդի ծնած ու սնած հերթական ճամբարափոխը հույսը դրել է գործող իշխանության վրա ու քայլում է դեպի իր «պայծառ ապագա»...

Թեև Ռոստոմյանը ԲՀԿ անդամ չէ, բայց հարկ է նկատել, որ նա Գագիկ Ծառուկյանի թիմակիցն է ու, ԲՀԿ-ՀՀԿ կոալիցիայի շրջանում, հենց այդ հիմքով է ժամանակին զբաղեցրել սպորտի և երիտասարդության հարցերի նախարարի, ինչպես նաև Արտակարգ իրավիճակների նախարարի պաշտոնները...

Ինչևէ, Ծառուկյանի հովանու տակ պատսպարված Ռոստոմյանն այժմ գնում է մտնի մեկ այլ տիրոջ թևի տակ (դե կան չէ՞ այդպիսիք, որ առանց սողալու չեն կարողանում պահպանել իրենց գոյը)։

Ու այդ դեպքում նրա համար կարևոր էլ չէ, որ նոր տերը ոչ ավել-ոչ պակաս, հայրենիքի դավաճանության ու կապիտուլյացիայի մեջ մեղադրվող Նիկոլ Փաշինյանն է։ Կարևորը` փորը կուշտ, քսակը լիքը, չաղ ու բախտավոր...

Ռոստոմյանն իր վերադարձի մասին հայտնել է մի շարք սպորտսմենների, որոնց հետ հանդիպում է կազմակերպել։

Newspress.am-ի տեղեկություններով, Հրաչյան ասել է, թե` Փաշինյանից «դաբրո» ունի ու պատրաստվում է կուսակցություն բացել։

Ըստ մեզ հասած տեղեկությունների` նա սպորտսմեններին ասել է նաև, որ իրեն սպասում է Երևանի քաղաքապետի պաշտոնը։

Հավանաբար ՀՀ պաշտպանության նախարարությանը նվիրաբերած իր Prinoth, T4SRP մակնիշի ձյուն հարթեցնող թրթուրավոր մեքենայով էլ նա փորձել է հարթեցնել ճանապարհը` դեպի իր «լուսապայծառ ապագան»...

Թեև մյուս կողմից էլ հարց է ծագում` որտեղի՞ց Հրաչյա Ռոստոմյանին այդ մեքենան. իհարկե, հնարավոր է, որ նա այն ձեռք է բերել ԱԻՆ֊ից` իր պաշտոնավարման շրջանում, ու հիմա, ըստ էության, ոչ թե նվիրում, այլ պարզապես պետությանն է վերադարձնում ժամանակին պետությունից տարածը...

Այլ կերպ ասած` վերադարձնում է, որ ամրագրի իր բաղձալի վերադարձը...