Հայրենիք ու տուն կորցրած 63-ամյա հադրութեցուն տուգանել են 420 հազար դրամ և այն գանձել թոշակից

Հադրութի բնակիչն ահազանգում է` իրեն ունեզրկել ու բռնագանձել են թոշակը։

28 տարվա զինծառայող, 3 պատերազմի մասնակից հադրութեցի 63-ամյա Սլավիկ Մարտիրոսյանը NEWSPRESS.am-ի հետ զրույցում պատմեց, որ 2020 թվականի նոյեմբերի 24-ին, իրեն ու իր հետ էլի մի 5-6 հոգու Ազատության հրապարակից բերման են ենթարկել։

Նա եկել էր ընդդիմության կողմից կազմակերպված հանրահավաքին մասնակցելու, իր խոսքով, Հադրութում թողած իր բարեկամներին` մայր ու աղջիկա` 87 և 55 տարեկան Վալյա և Անահիտ Թունյաններին գտնելու և հանդիպելու ակնկալիքով...

Նա պատմում է, որ հույս ուներ, որ եթե անգամ կանանց չհանդիպեր, ապա գոնե կլինեն հադրութեցիներ, ովքեր կարող էին տեղեկություն տալ նրանց մասին։

Բայց Սլավիկ Մարտիրոսյանը չի հասցնում ոչ ոքի հանդիպել, երբ նրան բերման են ենթարկում ու տանում Արաբկիրի բաժին։

«Անձնագիրս ստուգեցին, տեսան, որ Հադրութ եմ գրանցված, քֆուր տվեց` քեզ ինչի՞ են բերել ստեղ, քեզ ստեղ բերողի... անձնագիրս տվեցին ու ազատ թողեցին»,- պատմեց մեր զրուցակիցը:

Այս միջադեպից անցնում է 2 տարի։ 2022 թվականի փետրվարին, երբ Սլավիկ Մարտիրոսյանը գնում է թոշակ ստանալու, պարզվում է` թոշակի միայն կեսն է նստած հաշվեհամարին։ Երբ փորձում է պարզել բանկից, թե ինչու է այդպես, նրան բացատրում են, որ 420 հազար դրամ տուգանք կա վրան։

«Ասում եմ` ի՞նչ տուգանք, ասում են Արաբկիրի բաժնից։ Գնում եմ Արաբկիրի բաժին, ասում են` 2020֊ին, երբ քեզ բերման են ենթարկել, տուգանել են 420 հազար դրամ: Հարցնում եմ` բա՞ ինչի տեղյակ չեք պահել, ասում են` օնլայն հայտնել ենք։ Ի՞նչ օնլայն, ես ի՞նչ իմանայի»,- վրդովված պատմեց Սլավիկ Մարտիրոսյանը:

Սլավիկ Մարտիրոսյանը գրավոր դիմել է ոստիկանության պետին` Վահե Ղազարյանին և Երևանի վարչության պետին։ Քաղաքացուն պատասխանել են, որ բողոքարկումն ուշացնելու համար, այն չի բավարարվում։

Հարկ է նկատել, որ Սլավիկ Մարտիրոսյանի հետ տուգանված մյուս քաղաքացիները տուգանք չեն վճարել։ Վերջիններս օնլայն ծանուցվել են ու ժամանակին բողոքարկել են։ Իսկ քանի որ Մարտիրոսյանը չի ստացել օնլայն ծանուցում զուտ այն պատճառով, որ չի տիրապետում հիշյալ համակարգին, ուստի գործը գնացել է հարկադիր ու գումարը գանձվել է նրա թոշակից։

«Եթե ինձ ոչ մի փաստաթուղթ չեմ տվել տուգանքի մասին` ես ի՞նչ իմանայի: Տուն կորցրած, հայրենիք կորցրած, ապուպապերի գերեզման կորցրած` հադրութեցուն տուգանել են 420 հազար դրամ»,- նեղսրտած ասաց մեր զրուցակիցը։

Նա նաև նշեց, որ ապրում են 10 հոգով` ինքը, կինը, աղջիկը և 6 անչափահաս երեխա։ 

Զրուցեց` Արմինե Մկրտումյանը