Նիկոլ Փաշինյանը վախենում է ժողովրդից և դրա բոլոր պատճառներն ունի. ամեն ինչ շատ հստակ է՝ քիչ է մնացել. Իշխան Սաղաթելյան

Իշխանության ղեկին հայտնված էդ Քաջ Նազարը տվայտանքների ու խուճապի մեջ է: Այս մասին, այսօր լրագրողների հետ զրույցում ասաց ԱԺ փոխխոսնակ, ՀՅԴ ԳՄ ներկայացուցիչ Իշխան Սաղաթելյանը:

«Ինքն էսօր Հայաստանում ունի մեկ հենարան, դա ոստիկանությունն է, որը էդ մարդու հրահանգով շարունակում է ապօրինությունները: Ինչ որ կատարվում է այս պահին, ապօրինություն է, որևէ մեկի մտքով չանցնի, որ կարող է մտնել Դաշնակցության գրասենյակ ու այս ապօրինությունները շարունակի: Մենք այստեղ ենք, թույլ չենք տալու: Մեր երիտասարդները խաղաղ անհնազանդության ակցիա են արել, դա իրենց քաղաքացիական իրավունքն է: Ոստիկանությունն էլ թող օրենքի սահմաններում իրականացնի իր գործառույթները: Ինքը երեկվանից արդեն դուրս է գալիս իր գործառույթների շրջանակներից՝ կատարելով էդ մարդու ապօրինի հրահանգները: Մեր տղերքն էս պատերազմում կորցրել են իրենց եղբայրներին, ընկերներին ու հետ չեն  կանգնելու: Ո՞ր մեկին ձերբակալեն: Քանի՞ տասնյակ հազար մարդ կարող են ձերբակալել: Շատ կարճ ժամանակ հետո ոստիկանությունը հասկանալու է՝ ինչ է կատարվում: Տեսեք վայրկյանների ընթացքում քանի մարդ հավաքվեց»,- ասաց նա:

Նրա խոսքով՝ իրենք իրենց քալերով, իրենց գործողություններով ազգն ու ժողովուրդը ոտքի է կանգնել, շարժումը րոպե առ րոպե առաջ է շարժվում, իսկ ցանցային անհնազանդության ակցիաները շարունակվելու են:

«Նիկոլ Փաշինյանը վախենում է ժողովրդից և դրա բոլոր պատճառներն ունի. հասկանում է, որ այլևս ժողովրդին չի կարող խաբել, հասկանում է, որ այլևս ժողովրդին չի կարող մոլորեցնել, իսկ մեր ժողովուրդը ոտքի է կանգնել իր երկրի, իր իրավունքների, իր ազատությունների համար, լավ ապրելու, անվտանգ ապրելու նպատակով դուրս է եկել պայքարի: Սա մեկ քաղաքական ուժի, մեկ անհատի, մեկ անձի շարժում չէ, սա համաժողովրդական դիմադրություն է: Ես վստահ եմ, որ այդ արդյունքն ունենալու ենք և դա տեղի է ունենալու համաժողովրդական ընդվզման պայքարի միջոցով, դրա բոլոր նախադրյալները կան: Ամեն ինչ շատ հստակ է ՝ քիչ է մնացել»,- ասաց Սաղաթելյանը: