«Փողոցներից հանեք մարդկանց». Վանեցյանին մոտեցած կինը գրավոր առաջարկ էր բերել (տեսանյութ)

Երեկ՝ ապրիլի 27-ին, Ազատության հրապարակում «Հայոց Մայրերի Միություն» նախաձեռնության նախագահ Անահիտ Մամուլյանը գրավոր առաջարկ էր բերել ԱԺ «Պատիվ ունեմ» խմբակցության ղեկավար, «Հայրենիք» կուսակցության ղեկավար Արթուր Վանեցյանին:

«Ես ձեզ խնդրում եմ՝ մեր մի խումբ զավակներին մի հանեք մյուս խմբի դեմ: Սրա (նկատի ունի առաջարկը-հեղ.) օրինական հնարավորությունը կա Ազգային ժողովում: Երբ դուք այնտեղ խնդիր կունենաք, երբ ձեզ այնտեղ չեն լսի, էս ձեռքերով ու ոտքերով կանցնեմ երկաթե ճաղավանդակի վրայով, իմ հետևից մայրերի բանակը և ուժ կգործադրեմ՝ ընդունելու սա: Ուժը գործադրեք Ազգային ժողովում, գանք այնտեղ, ձեզ սատար կանգնենք, փողոցներից հանեք մարդկանց, խնդրում եմ»,- դիմելով Վանեցյանին՝ ասաց կինը՝ չհստակեցնելով սակայն, թե այդ ժամանակ արդյոք այդ նույն ոստիկանների դեմ դուրս չեն գալու: 

Պատասխանելով՝ Արթուր Վանեցյանն ասաց, որ եթե հիմա մարդկանց փողոցներից դուրս բերեն, ապա իրենք մեծ խնդիր են ունենալու: 

Տիկնոջ առաջարկի վերաբերյալ NEWSPRESS.am-ի թղթակիցը պարզաբանում խնդրեց «Հայրենիք» կուսակցության մամուլի քարտուղար Սոս Հակոբյանից: Ըստ նրա՝ կինն առաջարկում է՝ ԱԺ ընդդիմադիր պատգամավորները հայտարարեն, որ դուրս են գալիս խմբակցություններից՝ դառնալով անկախ պատգամավոր: 

«Միտքն այն է, որ ԱԺ ընդդիմադիր խմբակցությունները լուծարվեն, և քանի որ դա նախատեսված չէ Սահմանադրությամբ, այսինքն՝ Ազգային ժողովի ընդդիմադիր կողմը չի լինի, ըստ դրա դիմել ՍԴ և ասել, որ կա սահմանադրական ճգնաժամ: Այսինքն՝ հայտարարել, որ ԱԺ-ն լեգիտիմ չէ, ՍԴ-ն լուծարի ԱԺ-ն և գնալ արտահերթ ընտրությունների: Ակնհայտ է, որ այս մեխանիզմը չի կարող աշխատել: Սա մոտավորապես նույնն է, որ մարդիկ ասում են՝ վայր դրեք մանդատները, կամ, օրինակ, թող Իշխան Սաղաթելյանը հրաժարվի ԱԺ փոխխոսնակի պաշտոնից, և կստեղծվի սահմանադրական ճգնաժամ: Այդպիսի սահմանադրական ճգնաժամեր երբեք չեն ստեղծվել և չեն կարող ստեղծվել: Պատկերացրեք մի բան՝ որևէ ընդդիմություն կհրաժարվի՞ նման մեթոդից, եթե դա հնարվոր լինի»,- ասաց Հակոբյանը: 

Մանրամասները՝ տեսանյութում  

Հեղ.՝ Աստղիկ Հովհաննիսյան