Կրակոցներ «Մարատի խոզանոց»-ի մոտ. վիրավորներից մեկի վիճակը ծայրահեղ ծանր է

SHAMSHYAN.com-ի տեղեկություններով՝ երեկ, մայիսի 1-ին, կրակոցներ են հնչել Վայոց Ձորի մարզում։ Ժամը 19։20-ի սահմաններում «Եղեգնաձոր» բժշկական կենտրոնից ոստիկանության Եղեգնաձորի բաժին ահազանգ է ստացվել, որ «գլխի ջնջխված վերք» ախտորոշմամբ իրենց մոտ է տեղափոխվել մի քաղաքացի։ Ինչպես հայտնում է ֆոտոլրագրող Գագիկ Շամշյանը, հիվանդանոց են մեկնել ոստիկանության Եղեգնաձորի բաժնի օպերատիվ խումբը՝ համայնքային ոստիկանության բաժանմունքի տեսուչի գլխավորությամբ։ Ոստիկանները պարզել են, որ վիրավորը Եղեգնաձոր քաղաքի բնակիչ՝ 57-ամյա Արմեն Ավագյանն է, ով հայտնել է, որ վնասվածքը ստացել է Վայոց Ձորի մարզում հայտնի քարի տակ՝ «Մարատի խոզանոց»-ի մոտ, ավտոմեքենայից իջնելու ժամանակ վայր ընկնելու հետևանքով։

Մինչ Եղեգնաձորի ոստիկանության ծառայողները պարզում էին դեպքի հանգամանքները, նշված բժշկական կենտրոնից հերթական ահազանգն է ստացվում, որ «գանգուղեղային տրավմա» ախտորոշմամբ իրենց մոտ է տեղափոխվել մի քաղաքացի։ Ոստիկանները պարզում են, որ վիրավորը Եղեգնաձոր քաղաքի բնակիչ՝ 38-ամյա Ալիկ Մարտիրոսյանն է, ով անգիտակից վիճակում է եղել, երբ տեղափոխել են հիվանդանոց։ Արդեն դեպքի վայրում ոստիկանները հայտնաբերել են 4 հատ 5.45 մմ տրամաչափի պարկուճ, նույն տրամաչափի 1 հատ չկրակված փամփուշտ։

Փաստի առթիվ ոստիկանության Եղեգնաձորի բաժնում ՀՀ քր.օր-ի 258 հոդվածի 4-րդ մասի հատկանիշներով հարուցվել է քրեական գործ։ Ոստիկանությունը ձեռնարկում է անհրաժեշտ միջոցառումներ՝ դեպքի հանգամանքները, կռվի մասնակիցների իմքնությունը պարզելու և նրանց հայտնաբերելու ուղղությամբ։