Վաղը 12։00-ից ակցիաներ կանենք, 15:30-ին պետք է լինենք հրապարակում, որ Նիկոլին հրաժարականի պահանջ ներկայացնենք. Սաղաթելյան

«Դիմադրության շարժման» համակարգող, «Հայաստան» ընդդիմադիր դաշինքից խորհրդարանի փոխխոսնակ Իշխան Սաղաթելյանը  այսօր Ֆրանսիայի հրապարակում հրավիրված հանրահավաքի ընթացքում  քաղաքացիներին կոչ  է արել վաղը՝ ժամը 12:00-14:00-ը, շարունակել բողոքի ցույցերն ու անհնազանդության ակցիաները։

Մասնավորապես, նա հորդորել է  շարունակել փակել ճանապարհներն ու  փողոցները և   դրանից հետո, ժամը 15:30-ին,  հավաքվել Ֆրանսիայի հրապարակում։

«Վաղը Հայաստանի Ազգային ժողովի նիստում տեղի կունենա կառավարական ժամ։ Ժամը 16:00-ին Նիկոլ Փաշինյանը կժամանի Ազգային ժողով: Մենք պետք է ժամը 15:30-ին այստեղ լինենք, որպեսզի նրան հրաժարականի պահանջ ներկայացնենք: Ուստի ձեր ներկայությունը շատ կարեւոր է»,- ընդգծել է  Սաղաթելյանը։ և իսկական գործադուլի եւ դասերի բոյկոտն ընդլայնելու կոչ արել։

«Ձեր երեխաներին դպրոց մի ուղարկեք: Այս հրապարակում բոլորի ներկայությունը շատ կարեւոր է։ Առաջիկա օրերին վերջնականապես պետք է ֆիքսենք, որ նրանք իշխանություն չունեն։ Օրեցօր, ամեն րոպե մենք ավելի ու ավելի ենք շատանում։ Մենք գնալու ենք մինչեւ վերջ»,- դիմելով հայրենակիցներին՝ ասել է նա։