Լևոն Տեր-Պետրոսյանը շատ վտանգավոր թեզ է առաջ քաշում․ Ղազարյանը պարզաբանում է

Իշխանության բոլոր թևերում այսօր առանցքային պաշտոններում Լևոն Տեր-Պետրոսյանի ներկայացուցիչներն են։ Այս մասին այսօր «Հայելի» ակումբում ասաց ՍԴ աշխատակազմի նախկին ղեկավար, Լեհաստանում ՀՀ նախկին դեսպան Էդգար Ղազարյանը։

Նրա խոսքով՝ Վահե Գրիգորյանը երկնքից չի իջել Սահմանադրական դատարան, Գագիկ Ջհանգիրյանը՝ Բարձրագույն դատական խորհուրդ, Վահագն Խաչատուրյանը՝ ՀՀ նախագահական, Խաչատուր Սուքիասյանը՝ Ազգային ժողով: Նրանք բոլորը Լևոն Տեր-Պետրոսյանի կադրերն են։

«Նրանք պարզապես 2018 թվականի ողբերգությունն ուզում էին իրականացնել 2008թ․-ին։ 10 տարի պետականությունը փրկվեց, մինչև 2018-ին Նիկոլ Փաշինյանն եկավ։ Լևոն Տեր-Պետրոսյանն ասում է, որ ես կոչ եմ անում Նիկոլ Փաշինյանը, Ռոբերտ Քոչարյանը և Սերժ Սարգսյանը նստեն նույն սեղանի շուրջ և քննարկեն։ Նախ ես չեմ կարողանում հասկանալ, թե ընդհանրապես որևէ սեղանի շուրջ ինչո՞ւ պիտի նստի Նիկոլ Փաշինյանը, որովհետև, եթե նա մեկնաբանվում է իբրև գործող ղեկավար Հայաստանի, ապա այդ դեպքում պետք է այդ սեղանի շուրջ նստի նաև Իլհամ Ալիևը և Ռեջեփ Թայիփ Էրդողանը։ Որովհետև վերջիններս Նիկոլ Փաշինյանի հետ են ղեկավարում երկիրը։ Եվ երկրորդ՝ ես չեմ հասկանում, թե ինչու պետք է սեղանի շուրջ նստեն Ռոբերտ Քոչարյանն ու Սերժ Սարգսյանը, որովհետև եթե պետք է նստեն որպես նախկին ղեկավարներ, ապա, այդ դեպքում Հայաստանի նախկին ղեկավարներից մեկն էլ հենց Լևոն Տեր-Պետրոսյանն է։ Բա դու էլ պետք է այդ սեղանի շուրջ նստես։ Բա դու այդ սեղանի ո՞ր մասում պիտի նստես։ Այսինքն՝ դու ուղղորդում ես, որ ինչ-որ գործողություն իրականացնեն։ Դու պատասխանատվության գիտակցում չունե՞ս այս պետության և այս իրավիճակի համար։ Ես կարծում եմ, որ սա անազնիվ մոտեցում է, ավելին՝ մեծ վտանգ է պարունակում։ Բացի այդ, նա շատ վտանգավոր թեզ է առաջ քաշում։ Ասում է, որ հիմա ով էլ լինի իշխանության, եթե Նիկոլ Փաշինյանը տապալվի, միևնույն է նրան պարտադրվելու են բոլոր այն լուծումները, որոնք Նիկոլ Փաշինյանը մնալուց պետք է իրականացվի։ Տեսեք՝ սա ինչ վտանգավոր թեզ է։ Բայց դա այդպես չէ»,- ասաց Ղազարյանը։