«Առավոտ կանուխ բարձրացանք մոտակա լեռները». Ավետիք Չալաբյանը Վայոց ձորից տեսանյութ է հրապարակել

Ավետիք Չալաբյանը Վայոց ձորից տեսանյութ է հրապարակել: Նա ներկայացրել է, նա ներկայացրել է, թե որքան հիասքանչ են մեր լեռներն ու ինչու պետք է պայքարել՝ այն չկորցնելու համար: Չալաբյանը տեսանյութին կից նաև գրել է.

«Բարի լույս բոլորին:

Արդեն տևական ժամանակ է, մեր բնականոն կյանքը անվերադարձ խաթարվել է, ամենը օրը սկսում է պայքարով, շարունակվում աշխատանքով, նորից վերածվում պայքարի, ուժասպառ վերադառնում ես տուն, մի քանի ժամ քնում, և հաջորդ օրը նորից սկսվում է պայքարով:

Եթե ցանկանում ես սակայն, որ պայքարը չդառնա հոգեմաշ, ընդհակառակը՝ ուժ տա և ապրելու նոր տենչ, պետք է պարբերաբար վերադառնաս ակունքներին, հիշես, թե ինչ համար ես պայքարում, խորապես իմաստավորես դա, և նոր ավյունով վերադառնաս քո գործին:

Երկու օր առաջ, արթնանալով Վայոց ձորի գողտրիկ անկյուններից մեկում, առավոտ կանուխ բարձրացանք մոտակա լեռները, ու զմայլվում էինք մեզ շրջապատող հայոց երկրի անհավանական գեղեցկությամբ:

Այս չքնաղ երկիրն է, որի համար կարելի է ամեն օր պայքարել, որի սիրով կարելի է հավերժ ապրել, և հանուն որի կարելի է նաև անմռունչ մեռնել:

Բոլորիդ լավ օր, ապրելու և պայքարելու աննկուն կամքով»: