Մենք փորձում ենք պարզաբանումներ ստանալ իրավապահ մարմիններից, ինչից հետո կարողանում ենք հետևություններ անել․ ՄԻՊ-ը՝ իրավապահների գործողությունների մասին

Բնականաբար, ես տեղյակ եմ կատարվող դեպքերից, մենք հետևում ենք և իհարկե մենք պարզաբանումներ են տալիս դեպքերի հետ կապված։ Մենք նաև փորձում ենք պարզաբանումներ ստանալ իրավապահ մարմիններից, ինչից հետո կարողանում ենք հետևություններ անել։ Այս մասին լրագրողների հետ զրույցում ասաց ՀՀ Մարդու իրավունքների պաշտպան Քրիստիննե Գրիգորյանը՝ խոսելով «Դիմադրություն» շարժման ընթացքում բռնությունների գործադրման, բերման ենթարկելու և կալանավորելու դեպքերի մասին։

Հարցին, թե արդյոք իրավաչա՞փ է ձերբակալել միայնակ կնոջը, որն ինքնակամ ներկայացել է ոստիկանություն։

«Տեսանյութը, որին դուք հղում եք կատարում, ես ինքս դեռ չեմ հասցրել տեսնել, բայց դեպքի մանրամասներին տեղյակ եմ, պարզաբանումներ ենք պահանջել, որպեսզի հասկանանք մի շարք կարևոր հարցեր»,- նշեց Գրիգորյանը։

Հարցին, թե արդյոք այս ձերբակալություններն ու կալանավորումները չունեն քաղաքական ենթատեքստ, Գրիգորյանը նշեց․ «Ոստիկանության կողմից անհամաչափ ուժի և կոնկրետ բռնության դեպքերը նույնպես արձանագրվել են և համապատասխան պարզաբանումներ ու հաղորդումներ են ուղարկվել իրավապահ մարմիններին»: