Դուք հո գիժ չեք․ Վարդևանյանը՝ ԱՄՆ դեսպանատանն ու «Freedom House»-ին

Ուզում եմ հստակ ֆիքսենք, որ մենք կարողացանք մուտք գործել «Մարիոթ»։ Գոյություն ունեն օրենքներ և իրավունքներ և նորմալ պետություններում այդպես է ամեն ինչ կարգավորվում։ Մենք բարձրացանք վերև, բայց երբ մոտենում ես իշխանությանը, օրենքը վերանում է։ Այս մասին «Մարիոթ» հյուրանոցի դիմաց ասաց «Հայաստան» խմբակցության պատգամավոր Արամ Վարդևանյանը։

Նրա խոսքով՝ թեկուզ օրենքը փոխվում է, սակայն կա հայ տղամարդու վարքագիծ, բարոյական սահմաններ։ «Մեր գործընկերոջը՝ Աննա Գրիգորյանի ձեռքից քաշում է հայ տղամարդ, հանուն ինչի՞․․․ Ամո՜թ, ամո՜թ․․․ Բայց, իրականում, մեզնից որևէ մեկը չի ընկճվել։ Իսկ ավելի ընկճողը գիտե՞ք, թե որն էր․․․ չնայած այդքան էլ ընկճող չէր։ Ավելի ընկճող էր, որ էստեղ մտնելու համար ժողովրդավարական ԱՄՆ դեսպանատունը, «Freedom House» միջազգային կազմակերպությունը ցուցակ են տվել իրենց անուններով, բայց մեջն ընդդիմադիր մարդ չկա, որովհետև իրենք ուզում են լսել միայն իշխանական կարծիք։ Դուք հո գիժ չեք․․․ Ամո՜թ, ամո՜թ․․․։ Մենք արդեն հասկացանք, որ եվրոպացի ժողովրդավար մարդիկ տասնյակ ՊՊԾ ծառայողներով թե՛ դրսից, թե՛ ներսից, չեն թողնելու մեզ ներս մտնենք։ Եվ այս գրոծընթացը, այս վիճակն ունի ավարտի մեկ տարբերակ՝ մեր միասնականությունն ու մեր պայքարը։ Պայքա՜ր, պայքա՜ր․․․»,- նշեց Վարդևանյանը։

Հիշեցնենք, որ «Մարիոթ» հյուրանոցում «Freedom House» միջազգային կազմակերպությունն անցկացնում է «Հայկական ժողովրդավարությունը» թեմայով ֆորում: Այնտեղ են Նիկոլ Փաշինյանը, ԵՄ և ԱՄՆ դեսպանները, իրավապաշտպան կազմակերպությունների ներկայացուցիչներ և որտեղ թույլ չտվեցին ներս մտնել իշխանությանն անմիջապես չենթարկվող լրատվամիջոցներին: