Վարորդի 100 դրամ շորթելու մասին խոսելուց առաջ, պետք է խոսել քաղաքապետարանի թերի կատարած ծրագրից շորթված գումարների մասին

Վարորդները ծխում են, հեռախոսով խոսում են, վարորդները գումար են շորթում քաղաքից։ Այս մասին երեկ Երևանի ավագանու նիստում ասել էր «Իմ քայլը» խմբակցության անդամ Լևոն Զաքարյանը՝ նկատի ունենալով վերջին շրջանում քաղաք մուտք գործած կապույտ միկրոավտոբուսների և ավտոբուսների վարորդներին։

Նա արդարացիորեն նկատեց, որ ուղևորները դա տեսնում են, բայց լռում են․․․

Փաստացի Երևանի ավագանու իմքայլական անդամը հանցագործության մասին հաղորոդում տվեց։ Միևնույն ժամանակ, դարձյալ արդարության համար, պետք է նկատենք, որ քաղաքացիների կողմից ընտրված, ասել է թե՝ քաղաքացիների կողմից մանդատ ստացած Լևոն Զաքարյանը չնշեց, թե ինչու են, օրինակ, ուղևորներն անտարբեր ավտոբուսի վարորդի կողմից տեղի ունեցող այս «հանցագործության» նկատմամբ։

Նախ, չենք քննարկում, որ դրամներն արկղի մեջ գցելու համակարգը, հենց քաղաքապետարանի թեթև ձեռքով, կամ ավելի ճիշտ՝ անգործության հետևանքով, թերի է աշխատում։

Պետք է ներդրվեր քարտային համակարգ․ քաղաքացին քարտը ձեռք է բերում ցանկացած կրպակից, հաշվին նստեցնում ցանկալի գումարն, ու ավտուբուս նստելիս այլևս ոչ մի խնդիր։

Բայց ո՛չ, ավագանու իմքայլական անդամը հարց չի բարձրացնում, թե ինչո՞ւ չներդրվեց այս սկզբունքը, որը նախապես խոստացել էին․․․ ինչո՞ւ, չգիտեի՞ն կամ գլխի չէի՞ն ընկնում, որ միայն 100 դրամանոցների տարբերակով համակարգը լավ չի աշխատի։

Սա մի կողմից, մյուս կողմից էլ հարցն այն է նաև, որ երբ քաղաքացին կանգառում կանգնած բաց է թողնում ուղևորներով ծանրաբեռնված մի քանի ավտոբուս ու սպասում հերթականին, որը գալիս է 15-20 րոպեից ոչ շուտ ու դարձյալ ծանրաբեռնված, և դժվարությամբ բարձրանում է տրանսպորտ՝ արդեն, մեղմ ասած, թքած ունի՝ իր ձեռքի գումարը կգցի արկղի մե՞ջ, թե՞ վարորդի գրպանը․․․

Հնարավոր է, որ քաղաքացին չպետք է թքած ունենա, բայց ավագանու պարոն անդամն ավելի ազնիվ կլիներ, եթե վարորդների 100 դրամ շորթել-չշորթելու և ուղևորի լռելու մասին խոսելիս նաև խոստովաներ, որ որոշակի ժամերի, իսկ ավելի կոնկրետ՝ աշխատանքի գնալու և վերադառնալու պիկ ժամերին, տրանսպորտի ինտենսիվ աշխատանքի փոխարեն քաղաքացիները առճակատվում են խցանումների, ժամերով կանգնում են կանգառում, ավտոբուսում իրար գրկած երթևեկում և հանդիպում համանման այլ խնդիրների․․․

Այնպես, որ վարորդի 100 դրամ շորթելու մասին խոսելուց առաջ, պետք է խոսել նաև քաղաքի բյուջեից այս ծրագրի շրջանակում շորթված գումարներից ու կիսատ թողած աշխատանքից․․․

Այս ֆոնին արդեն շատ հնարավոր է, որ այդ 100 դրամները վարորդի գրպանում ավելի ապահով լինեն, քանի որ մեծ հարցականի տակ է, թե արդյոք այդ դրամները կգնա՞ն քաղաքի բյուջե ու կծառայե՞ն նպատակին, թե՞ ոչ՝ կիսատ թողած քարտային համակարգի ներդրումը վկա․․․