Ի՞նչ ես դու անում․․․ եթե դու ոչինչ չես անում, ապա արի և ընդունիր, որ դու ուզում ես՝ Նիկոլը մնա․ Մինասյան

Մենք մեռանք բացատրելով, որ կապիտուլյացիայով ոչինչ չի ավարտվում։ Կապիտուլյացիայից հետո սկսվում է մի նոր փուլ՝ սահող կապիտուլյացիան։ Այն շարունակվելու է մինչև Հայաստանն իսպառ վերացումը։ Այս մասին «Հայելի» ակումբում ասաց ԱԺ նախկին պատգամավոր Գագիկ Մինասյանը։

Մինասյանի խոսքով՝ վաղն ավելի ծանր է լինելու, քան այսօր, այսօր ավելի ծանր է լինելու, քան երեկ։ Եվ երբ ասվում է, որ օր առաջ այս չարիքից պետք է ազատվել, հենց այդ պատճառով, որովհետև, եթե մենք այսօր չազատվենք, ապա վաղը էլ ավելի բարդ խնդիրների առաջ ենք կանգնելու։

«Դանակը ոսկորին է հասել, և յուրաքանչյուր մարդ պետք է կարողանա իր առջև ազնիվ լինել, քանի որ կարելի է դիմացինին խաբել, բայց երբ ինքդ քեզ ես խաբում շատ ծանր բան է։ Յուրաքանչյուր հայ մարդ ինքն իրեն պետք է հարց տա, թե արդյոք ուզո՞ւմ է, որ Նիկոլը մնա իշխանության։ Կա՛մ այո, կա՛մ ոչ։ Եթե ինքն ուզում է, որ Նիկոլը հեռանա, ապա առաջանում է երկրորդ հարցը․ ի՞նչ ես անում դու դրա համար։ Կարելի է դուրս գալ փողոց, կարելի է ֆեյսբուքում պայքարել, կարելի է հարևանին բացատրել․․․ Լավ, ինքդ ի՞նչ ես անում դրա համար։ Եթե դու ոչինչ չես անում, ապա արի և ընդունիր, որ դու ուզում ես՝ Նիկոլը մնա։ Բայց այդ դեպքում ընդունիր, որ 5000 տղաների մահը քո վզին է, ընդունիր, որ Ղարաբաղի ներկայիս վիճակը քո վզին է, Հայաստանի վաղվա խայտառակ վիճակը՝ ևս։ Իմացիր այս բոլորի մեղքի բաժինը քոնն է։ Շատ դաժան է իրավիճակը»,- ասաց Մինասյանը։