Այս իշխանություններն չգիտեն՝ ինչպես պաշտպանել հայկական դիրքերը՝ բանակցային գործընթացում. Արմեն Ռուստամյան

Իրենք չգիտեն, թե ինչպես պաշտպանել հայկական դիրքերը բանակցային գործընթացում։ Սա հերթական անգամ դրա դրսևորումն է, իսկ Մադրիդյան սկզբունքներն ինքնին  փոխզիջումների փաստաթուղթ էր, իսկ փոխզիջումը ենթադրում է մեր կողմից էլ զիջում։ Մենք իսկապես շատ գրագետ քայլ ենք արել մեր զիջումը համարելով այն, որ կարելի է ևս մեկ հանրաքվե անցկացնել Ղարաբաղում, մանավանդ մենք վստահ ենք, որ այդ հանրաքվեի արդյունքը նույնն է լինելու։ Այս մասին լրագրողների հետ զրույցում ասաց «Հայաստան» խմբակցության պատգամավոր Արմեն Ռուստամյանը։

Ըստ Ռուստամյանի՝ խոսքը Ղարաբաղում անցկացվող հանրաքվեի մասին էր, ոչ թե Ադրբեջանում՝ ամբողջ տարածքով, և խոսքը նրա մասին էր, որ այն համամասնությամբ դա պետք է տեղի ունենար ինչ-որ ժամանակին այդտեղ եղել է հայերի և ադրբեջանցիների համամասնություն 1988թ․-ից սկսած։

«Այսինքն ակնհայտ էր, որ այդ հանրաքվեն տալու էր նույն արդյունքը։ Հիմա եթե դու գիտես, որ այդ հանրաքվեն նույն արդյունքն է տալու, բայց արդեն ճանաչում է ունենալու միջազգային մասշտաբով, բնականաբար, դրան գնալն ամենամեծ հաջողությունն է։ Ես զարմանում եմ, որ այսքան ժամանակ պաշտոնի լինելով՝ չեն հասկացել, որ դա մեր կողմից շատ գրագետ քայլ է եղել՝ ևս մեկ անգամ հանրաքվեի արդյունքը կրկնել, բայց արդեն միջազգայնորեն ճանաչված․ փոխհամաձայնեցված վիճակով։ Եվ աշխարհում էլ նման փորձ կա։ Սա մեկ, և երկրորդը, երբ ասում են, որ մենք ձախողել են, որովհետև Ադրբեջանին տվել ենք հնարավորություն վետո դնելու, դա խոսում է այն մասին, որ այդ մարդիկ ընդհանրապես բանակցության իմաստը չեն հասկանում»,- նշեց Ռուստամյանը։