36, 24 տարի աշխատած, պատիվ, հարգանք ունեցող բժշկին այսօր անհիմն ասում են՝ դու պետք է չաշխատես. Սուրբ Գրիգոր Լուսավորիչ բ/կ–ի սրտաբանական բաժանմունքի բժիշկներն ահազանգում են

Սուրբ Գրիգոր Լուսավորիչ բժշկական կենտրոնից հերթական բժիշկների խումբն է ազատվել աշխատանքից:

168.am-ի խմբագրություն դիմած սրտաբանական բաժանմունքի արդեն նախկին աշխատակիցները հայտնեցին, որ մայիսի 2-ին իրենց կանչել և պարտադրել են աշխատանքից ազատվելու դիմումներ գրել՝ պատճառաբանելով, թե բժշկական կենտրոնը վերապրոֆիլավորվում է:

«Մայիսի 2-ին ամբողջ հիվանդանոցի անձնակազմին կանչեցին, ասացին՝ եկեք ազատման դիմում գրեք, քանի որ վերապրոֆիլավորվում ենք: Մեր հարցին՝ թե ինչո՞ւ, ի՞նչ չափանիշներով եք առաջնորդվել, պատասխանեցին, որ խորհուրդն այդպես է որոշել, մենք էլ ասացինք՝ խորհուրդն ո՞վ է: Մեկը գցում է փոխտնօրենի վրա, փոխտնօրենը՝ բաժնի վարիչի: Մեր վրա ժամ դրեցին, ասացին՝ մինչև ժամը 5-ը պետք է դիմումը գրեք: Մտածում էինք, քանի որ վերապրոֆիլավորվում է հիվանդանոցը, միգուցե մոտեցումն այսպիսին է. ազատման դիմում գրենք, հետո նորից հրահանգ լինի աշխատանքի անցնելու: Աշխատանքից ազատել են մայիսի 19-ով»,- մեզ հետ զրույցում պատմեցին բժիշկները:

Նրանք նշեցինք՝ բոլորը եղել են հաստիքով աշխատողներ, կորոնավիրուսի ժամանակ ևս աշխատել են:

«Ոչ նկատողություն, ոչ նախազգուշացումներ ենք ունեցել, ոչ զեկուցագրեր կան մեր դեմ գրված: Ոչ մի նման խնդիր չենք ունեցել: Մենք այն բուժքույրերն ու բժիշկներն ենք եղել, ովքեր անգամ բաժնի վարիչին են սովորեցրել, թե ինչպես աշխատի: 36, 24 տարի աշխատած, պատիվ, հարգանք ունեցող բժշկին այսօր անհիմն ասում են՝ դու պետք է չաշխատես: Ո՞նց թե: Ի՞նչն են հիմք ընդունել. խաբարբզիկ, խոսք-տանող բերող չենք, գլուխներս կախ աշխատել ենք, դրա համա՞ր: Միայն սրտաբանական բաժանմունքից 5-6 բժիշկ, 6-7 էլ բուժքույր է ազատվել աշխատանքից: Մի մարդու քմահաճույքի պատճառով մենք այսօր մնում ենք անգործ: Մենք ներդրում չե՞նք ունեցել այդ հիվանդանոցում, ուղղակի վիրավորական է՝ այդպես բռնել ու դուրս շպրտել»,- ասացին բժիշկները՝ հավելելով, որ դիմելու են դատարան:

Խնդրի վերաբերյալ լրացուցիչ պարզաբանումներ ստանալու նպատակով դիմել ենք նաև Սուրբ Գրիգոր Լուսավորիչ բժշկական կենտրոն, որի պատասխանը կներկայացնենք ավելի ուշ:

Հիշեցնենք, որ մայիսի 7-ին ևս բժշկական կենտրոնից բժիշկների էին ազատել աշխատանքից: Սուրբ Գրիգոր Լուսավորիչ բժշկական կենտրոնի հասարակայնության հետ կապերի համակարգող Աիդա Կարապետյանը, անդրադառնալով բարձրացված խնդրին՝ պարզաբանել էր. «125 բժշկի՝ ազատման լուրը համարում եմ ուռճացված։ Բժիշկների ազատում տեղի ունեցել է, բայց այդ թիվը նույնիսկ մեկ տասնյակի չի հասնում։ Պատճառն այն է, որ նույն բժիշկները, որոնք երդվյալ են մարդկանց կյանքն ու առողջությունը պահպանելու` երկու տարի աշխատանքի չեն ներկայացել։ Բոլորիս հայտնի է, որ երկու տարի Սուրբ Գրիգոր Լուսավորիչ ԲԿ-ն աշխատել է որպես քովիդ կլինիկա։ Իսկ նրանք գրավոր հրաժարվել են աշխատել քովիդի պայմաններում։ Բնական ու նորմալ է, չէ՞, որ երկու տարի աշխատանքից բացակայած անձանց հետ պետք է լուծարվեին պայմանագրերը։ Հիվանդանոցը բացման նախաշեմին նոր ծառայություններով ու մեծ հնարավորություններով աշխատելու է, դրա համար թիմն ունի համալրման կարիք։ Ինչ վերաբերում է իրերին, ապա այս երկու տարվա ընթացքում հիվանդանոցը փակ ռեժիմում է, և բացի աշխատող անձնակազմից, պացիենտներից ու օրենքով թույլատրվող խնամակալներից, որևէ մեկը փակ ռեժիմում գործող հիվանդանոցը մտնել չի կարող։ Հիշեցնեմ, որ մենք դեռ չենք բացվել»:

Հ․Գ․ Կապ հաստատեցինք Սուրբ Գրիգոր Լուսավորիչ բժշկական կենտրոնի հասարակայնության հետ կապերի համակարգող Աիդա Կարապետյանի հետ, ով խնդրի առնչությամբ տվեց հետևյալ պարզաբանումը.

«Քովիդ համավարակի ավարտով ու կլինիկայի վերաբացումով պայմանավորված` աշխատանքային հարաբերություններում փոփոխություններ են տեղի ունենում։ Ինչ վերաբերվում է հարցին, թե իբր դիմում գրելիս գրված չէ, թե որ օրով են աշխատանքից ազատվում, տեղեկացնեմ, որ գործատուն կարող է դիմումի ներկայացման պահից 30 օրվա ընթացքում լուծել պայմանագիրը: Բացի այդ, նրանք հրավիրվել են համապատասխան բաժին՝ ծանոթանալու իրենց ազատման հրամանին, որտեղ նաև օրվա մասին է բնականաբար նշված, սակայն արդեն նախկին աշխատակիցները հրաժարվել են վերցնել իրենց օրինակը, որը օրենքի պահանջի համաձայն՝ ուղարկվել է նրանց հաշվառման ու բնակության հասցեներով»: