Ուր էլ գնաս, մեկ է՝ մեզ հետ հանդիպելու ես, կատվի վազքը մինչև մարագն է. Լիդա մայրիկը՝ Արգիշտի Քյարամյանին

44-օրյա պատերազմի մասնակից, Արցախի հերոս Դավիթ Առուշանյանի մայրը՝ Լիդա Առուշանյանը, «Հայելի» ակումբում պատմեց որդու անցած ճանապարհի և 44-օրա պատերազմում նրա մասնակցության մասին։

Դավիթ Առուշանյանն ավարտել է Արտեմ Միկոյանի անվան միջնակարդ դպրոցը, այնուհետև ուսումը շարունակել ՀՀ ՊՆ Վազգեն Սարգսյանի անվան ռազմական ինստիտուտում։ Ավարտելով՝ գործուղվել է Արցախ և 11 տարի ծառայել Արցախի Իվանյան տանկային զորամասում։ Դավիթը 2020թ․-ի 44-օրյա պատերազմի հենց առաջին օրվանից եղել է առաջնագծում։ Զոհվել է սեպտեմբերի 29-ին՝ Արեգասարի համար մղվող մարտերում՝ Մատաղիս-Թալիշ ուղղությամբ։ 

«Որդիս ունի 4 երեխա՝ 1 աղջիկ և 3 տղա։ Մեծը Լիդիան է, իսկ տղաները փոքր են՝ Ալեքսը, Դանիելը և Հայկը։ Լիդիան 5-րդ դասարան փոխադրվեց, իսկ տղաները դպրոցական չեն։ Ապրում են 3-րդ մասում՝ վարձով բնակարանում»,- նշեց տիկին Լիդան։ 

Վերջինիս խոսքով՝ երեկ ծնողների համար ամենազավեշտալի և միևնույն ժամանակ ողբերգական օրն է եղել: 

«Գնացինք Արգիշտի կոչեցյալի մոտ ( նկատի ունի ՀՀ ՔԿ նախագահ Արգիշտի Քյարամյանին-խմբ.), որը 5 օր առաջ պայմանավորվել էր մեզ հետ հանդիպել և պատասխան տալ։ Դուրս չեկավ։ Ի դեպ ասեմ, որ այս վերջերս ՔՊ-ականների, նախարարների մոտ պախկվոցի խաղալը մոդա է դարձել։ Քյարամյանը երեկ մեզ հետ պախկվոցի խաղաց՝ իր կարծիքով։ Նա չի կարող մեզ հետ պախկվոցի խաղալ։ Ես ասել եմ՝ ուր էլ գնաս, մեկ է՝ վաղ թե ուշ մեզ հետ հանդիպելու ես։ Գուցե՝ Եվրոպայում, եթե արժանանաս այդ բախտին կամ կենդանի մնաս։ Բայց կատվի վազքը մինչև մարագն է»,- նշեց տիկին Լիդան։