Չափազանց անլուրջ հայտարարություն էր, եթե չասենք` թեթևսոլիկ. Արցախն Ադրբեջանի կազմում տեսնող ՔՊ-ականը` Իշխան Սաղաթելյանի հայտարարության մասին

«Իրավունք» թերթը գրում է․

««Դիմադրության» շարժման համակարգող Իշխան Սաղաթելյանը հայտարարել է, որ այսօր՝ հունիսի 3-ին, գծվելու է ջրբաժան, մասնավորապես նշելով. «Ով դեմ է արտահերթ նիստին առաջարկվող փաստաթղթին, ինքը դեմ է հայ ժողովրդին, ինքը կամ թշնամու գործակալ է կամ սպասարկում է թշնամու շահերը... Սա ջրբաժան է»: Վերը նշվածի շուրջ «Իրավունքը» մեկնաբանություն խնդրեց ԱԺ «Քաղաքացիական պայմանագիր» խմբակցության պատգամավոր Վիգեն Խաչատրյանից, ով նկատեց.

-Չափազանց անլուրջ հայտարարություն էր, եթե չասենք` թեթեւսոլիկ:

- Իսկ, ընդհանուր առմամբ, ինչպե՞ս եք տեսնում ստեղծված իրավիճակի հանգուցալուծումը` փողոցներ են փակվում, երթեւեկությունն է կաթվածահար լինում:

- Դա իրենց ներքին պրոբլեմն է, թող իրենք մտածեն: Իրենք ինչ նախաձեռնում են, միանգամից տապալվում է, սա էլ նրանց հերթական անիմաստ ծրագրերի տապալումն է:

- Պարոն Խաչատրյան, ինչպե՞ս կմեկնաբանեք այն, որ թեեւ Ալիեւը պաշտոնական հայտարարություններով նշում է, որ կողմ է խաղաղության դարաշրջանին, բայց սահմանում պարբերաբար դիմում է սադրանքների, վերջին բախման արդյունքում ունեցանք կրկին մեկ զոհ:

- Ես կարծում եմ, որ Ալիեւը պարբերաբար բախումներ է սադրում այն պարզ պատճառով, որ այն քաղաքական ուղեգիծը, որը որդեգրել են ՀՀ իշխանությունները, մեծ հաշվով Ալիեւին ոչ շահեկան վիճակում է դնելու, եւ դա Ալիեւը շատ լավ գիտակցում է: Եվ այս համատեքստում փորձում է ոչ բացահայտ խոչընդոտել: Ինչու ոչ, նաեւ բացահայտ, որովհետեւ ակնհայտ է, որ այսօր ՀՀ արտաքին քաղաքականությունը ստանում է միջազգային հանրության լայն աջակցությունը, որը, ըստ երեւույթին, Ալիեւին երբեմն-երբեմն հունից հանում է:

Հ.Գ.- Երբեմն մարդ նույնիսկ ապշում է ՔՊ-ականների ասածներից: Մի ամբողջ պատերազմ են տանուլ տվել, ունեցել հազարավոր զոհեր, կորցրել են Արցախի 75 տոկոսը, անգամ Հայաստանի հողեր են հանձնել եւ վախենում են այդ մասին ծպտուն անգամ հանել: Ու այսքանից հետո պարզվում է, որ Ալիեւին «ոչ շահեկան վիճակում են դրել»: Բայց արդյոք Նիկոլը չէ՞ր երազի, որ Ալիեւի այդ «ոչ շահեկան վիճակում» լիներ»:

Մանրամասները՝ թերթի այսօրվա համարում։