Այսպիսի ժողովուրդ չի լինում, ուղղակի չի լինում, որ կիրառվի լուսաձայնային նռնակ ու գրեթե ոչ մեկ տեղից չշարժվի, սա է ցուցիչը մեր ազգի. Հայկ Մամիջանյան
Ազգային ժողովի «Պատիվ ունեմ» խմբակցության քարտուղար Հայկ Մամիջանյանի գնահատմամբ Փաշինյանը երեկ իր նյարդային դրսևորումների գագաթնակետին հասավ ու անհիմն հրաման տվեց կիրառել հատուկ միջոցներ:
Ըստ նրա՝ սա ևս մեկ կարմիր գիծ էր, որն անցավ Նիկոլ Փաշինյանը:
«Այսպիսի ժողովուրդ չի լինում, ուղղակի չի լինում, այսպիսի ցուցարար չի լինում, որ կիրառվի լուսաձայնային նռնակ ու գրեթե ոչ մեկ տեղից չշարժվի, սա է ցուցիչը մեր ազգի», - նշեց Մամիջանյանը:
Ընդդիմադիր պատգամավորի խոսքով՝ արևմտյան երկրների հանցավոր լռությունը խաղաղ ցուցարարների դեմ իրականացվող վայրագությունների հետ կապված արժեք ունի:
«Ես հիմնավոր կասկած ունեմ մտածելու՝ որպեսզի չստանա հանդիմանող հայտարարություններ այս կամ այն միջազգային կառույցից, Փաշինյանը զոհում է ղարաբաղյան հակամարտության շուրջ բանակցությունների ընթացքում այս կամ այն կետերը, որովհետև դա անմտություն է՝ լինելով միջազգային խոշոր բանակցության մեջ, նման խոցելիություն ստեղծել երկրի համար, իրականացնել նման հակաժողովրդավարական գործողություններ:
Իմ կարծիքով՝ արևմտյան որոշ դեսպանատների, միջազգային որոշ կառույցների լռությունը «վճարվում է» ղարաբաղյան հակամարտության բանակցային գործընթացում Փաշինյանի կողմից էլ առավել պարտվողական ու զիջողական դիրքով», - ասաց Հայկ Մամիջանյանը:
