Տնտեսության վերաբերյալ Իլոն Մասկը «շատ վատ կանխազգացում» ունի

Tesla-ի գործադիր տնօրեն Իլոն Մասկը «շատ վատ կանխազգացում» ունի տնտեսության վերաբերյալ եւ ցանկանում է կրճատել էլեկտրամեքենաների ընկերությունում աշխատատեղերի մոտ 10 տոկոսը, ասել է նա հինգշաբթի օրը ղեկավարներին ուղղված նամակում, որը հայտնվել է Reuters-ի տրամադրության տակ:

Հաղորդագրությունը հնչել է երկու օր անց այն բանից, երբ Մասկը աշխատակիցներին ասել է վերադառնալ աշխատանքի կամ հեռանալ ընկերությունից:

Tesla-ում եւ նրա դուստր-ձեռնարկություններում 2021 թվականի վերջին աշխատում էր մոտ 100 000 մարդ, ըստ SEC-ի տարեկան հաշվետվության:

Մասկի կտրուկ նախազգուշացումը պոտենցիալ ռեցեսիայի եւ ավտոարտադրողների համար դրա հետեւանքների մասին ամենաուղիղ եւ ամենաաղմկոտ կանխատեսումն է այս ոլորտում:

Մասկի մռայլ կանխատեսումը կրկնում է ղեկավարների՝ ներառյալ JPMorgan Chase (JPM) գլխավոր տնօրեն Ջեյմի Դայմոնի եւ Goldman Sachs (GS)-ի նախագահ Ջոն Ուոլդրոնի վերջին մեկնաբանությունները։

Մասկի պահանջը, որ աշխատակիցները վերադառնան գրասենյակ, Գերմանիայում արդեն դիմադրության է հանդիպել:

«Tesla»-ի յուրաքանչյուր աշխատակից պարտավոր է շաբաթական նվազագույնը 40 ժամ անցկացնել գրասենյակում,- գրել է Մասկը երեքշաբթի օրը նամակում,- Եթե չներկայանաք, մենք կհամարենք, որ դուք ազատվել եք աշխատանքից»:

Հինգշաբթի օրը Մասկը Twitter-ում վիճաբանության մեջ է մտել ավստրալացի տեխնոլոգիական միլիարդատեր եւ Atlassian-ի համահիմնադիր Սքոթ Ֆարկուհարի հետ, որը մի շարք թվիթներում ծաղրել է հրահանգը՝ այն անվանելով «1950-ականներից ինչ-որ բան»:

«Ռեցեսիան ծառայում է որպես տնտեսության համար կենսական մաքրման գործառույթ», - գրել է միլիարդատերը՝ ի պատասխան Ֆարկուհարի թվիթի, որը Tesla-ի աշխատակիցներին հորդորել է մտածել հեռահար աշխատանքի հնարավորության մասին: