Ինչպես կարող է ՌԴ ԱԳ նախարարը հանդիպել է այն մարդկանց խմբի հետ, որոնք պարբերաբար վնասել են Հայաստանի և Ռուսաստանի եղբայրությանը․ Մամիջանյան

Այսօրվա ելույթս պետք է ընկալել ոչ թե որպես բողոք, այլ ընկերական, դաշնակցային պահանջատիրություն։ Հայաստանի և Ռուսաստանի բարեկամությունը, ռազմավարական դաշնակցությունը ոչ միայն միջազգային պայմանագրերով է ֆիքսված, այլև արժեքաբանական՝ մեր ժողովուրդների բարեկամությամբ ֆիքսված։ Այս մասին ՀՀ ԱԳՆ-ի դիմաց հայտարարեց «Պատիվ ունեմ» խմբակցության պատգամավոր Հայկ Մամիջանյանը։

Պատգամավորի խոսքով՝ իրենք առնվազն տարակուսած են և չեն հասկանում, թե ինչպես կարող է ՌԴ ԱԳ նախարարը հանդիպել է այն մարդկանց խմբի հետ, որոնք պարբերաբար, տասնամյակներ շարունակ վնասել են Հայաստանի և Ռուսաստանի եղբայրությանը։

«Ո՞նց կարելի է հանդիպել այն մարդկանց հետ, որոնց պառլամենտական ֆրակցիան 2021թ․ նոյեմբերի 16-ին իրադարձությունների ժամանակ անհիմն հակառուսական և ՀԱՊԿ-ի քննադատության հիստերիա էր բարձրացրել Ազգային ժողովում։ Մենք ակնկալում ենք, որ կստանանք պատասխան, թե երբ է իրականացվելու Փառուխի և Քարագլխի դեպքերից հետո ՌԴ ՊՆ հայտարարությունը, առ այն, որ ադրբեջանական զորքերը քաշվելու են ելման դիրքեր։ Մենք հույս ունենք, որ նոյեմբերի 9-ի խայտառակ պայմանագրի, փոքրիշատե հայամետ կետը՝ գերիների վերադարձի կետը, վերջապես կիրականացվի Ադրբեջանի կողմից: Եվ այդ թվում նաև ՌԴ նախագահի ստորագրությունը կա այդ պայմանագրի տակ։ Մենք հույս ունենք, որ այս ցուրտ ձմռանը Արցախին առանց գազամատակարարման թողնելը, որը այլ կերպ չի լինում որակել որպես՝ սոցիալական տեռոր, այլևս մեր դաշնակիցը թույլ չի տա»,- նշեց Մամիջանյանը։

Մամիջանյանի խոսքով՝ այս իշխանություններն անցողիկ են և արդեն անցած են, բայց հայ-ռուսական բարեկամությունը դարերով է հավերժ են, դարերով օծված միմյանց խառնված մեր և ռուս ժողովուրդների Մեծ Հայրենական, Երկրորդ համաշխարհային և դարերով անցած պատերազմներով, որտեղ նրանք կռվել են կողք-կողքի։