Այս ակցիաները զսպաշապիկ են իշխանությունների համար՝ կանգնեցնելու կամ դանդաղեցնելու այն վտանգավոր գործընթացները, որոնք իրենք նախաձեռնել են․ Տիգրան Աբրահամյան

Իշխանությունը մի կողմից ուզում է ցույց տալ, թե իբրև չի նկատում երկրում տեղի ունեցող ներքաղաքական իրադարձությունները։ Բայց մյուս կողմից մարդկանց վրա՝ տարբեր կառույցների՝ ուժային կառույցների և մասնավոր կազմակերպությունների միջոցով փորձում է ազդել և կանխել մարդկանց մասնակցությունը հավաքներին։ Այս մասին ՀՀ արտաքին գործերի նախարարության մոտ ասաց «Պատիվ ունեմ» խմբակցության պատգամավոր Տիգրան Աբրահամյանը։ 

Աբրահամյանի խոսքով՝ մամուլում տեղեկություններ եղան նաև, որ մարդկանց աշխատանքից ազատել են այն պատճառով, որ նրանց ընտանիքի անդամներից մասնակցել են հավաքներին։ Եվ իշխանության այն մոտեցումը, թե իբրև չի նկատում երկրում ընթացող ակտիվ գործընթացները, բնականաբար որևէ կապ չունեն իրականության հետ։ 

«Ինչ վերաբերում է միջազգային խաղացողներին և միջազգային հանրությանը, ապա անկախ այն հանգամանքից, թե գործընթացներն ինչ հունով են ընթանում, բոլորին հայտնի է, որ Նիկոլ Փաշինյանը միակ դերակատարը չէ, որ կարող է որոշում կայացնել։ Եվ առհասարակ, Նիկոլ Փաշինյանը չունի մանդատ Արցախի, ինչպես նաև այլ հարցերի հետ կապված որոշում կայացնելու։ Այս ամենը պետք է կանգնեցնել և նվազագույնը կանգնեցնել ճնշումների միջոցով, որովհետև մինչև իշխանություններին էլ հասնելը, այս ակցիաները զսպաշապիկ են իշխանությունների համար՝ կանգնեցնելու կամ դանդաղեցնելու այն վտանգավոր գործընթացները, որոնք իրենք նախաձեռնել են»,- նշեց Աբրահամյանը: