Ե՛վ Ադրբեջանը, և՛ Հայաստանը ունեն կոնկրետ ցանկություններ, որոնք միշտ չէ, որ համընկնում են․ Լավրով

«Ադրբեջանի, Հայաստանի և Ռուսաստանի ղեկավարները երեք անգամ հանդիպել են տարածաշրջանում հակամարտությունը դադարեցնելու և հարաբերությունները կարգավորելու, այդ թվում՝ Ադրբեջանի և Հայաստանի միջև։ Գործընթացը առաջ է գնում։ Իհարկե, կուզենայի, որ ավելի արագ տեմպերով շարժվեին, բայց մենք արդեն միջանկյալ արդյունքներ ենք տեսնում»։

Այս մասին Հայաստանի արտգործնախարար Արարատ Միրզոյանի հետ Երևանում կայացած մամուլի ասուլիսի ժամանակ ասել է ՌԴ ԱԳ նախարար Սերգեյ Լավրովը։

Նա ընդգծել է, որ Ռուսաստանն ամեն ինչ անում է երկու երկրի միջև խաղաղության վերջնական համաձայնագրի կնքմանը նպաստելու համար։

«Ե՛վ Ադրբեջանը, և՛ Հայաստանը ունեն կոնկրետ ցանկություններ, որոնք միշտ չէ, որ համընկնում են։ Բայց առաջնորդների միջև պայմանավորվածությունները ճանապարհային քարտեզն են։ Մենք շատ գոհ ենք, որ արդեն կայացել է սահմանների սահմանազատման հանձնաժողովի առաջին նիստը։ Ինչպես տեղեկացանք, հաջորդ հանդիպումը նախատեսված է Մոսկվայում։ Ռուսաստանը պատրաստ է, համաձայն երկրների ղեկավարների պայմանավորվածությունների, ամեն կերպ օգնել այդ հարցում։ Նաև երկրների փոխվարչապետների գլխավորությամբ տարածաշրջանում հաղորդակցությունների ապաշրջափակման գործընթացը շատ առաջ է գնացել։ Մենք համոզված ենք, որ հարաբերությունների կարգավորումից բացի, այլ ճանապարհ չկա։ Ռուսաստանը պատրաստ է աջակցել Ադրբեջանի և Հայաստանի միջև հարաբերությունների կարգավորման գործընթացին՝ որպես միջնորդ և խորհրդատու»,- ասել է Լավրովը։