Եթե Նիկոլ Փաշինյանը մեղավոր չէ՝ ինչո՞ւ են խուսափում նրան հարցաքննելուց․ զոհվածների ծնողներ (տեսանյութ)

«Մեր խնդիրը մեկն է՝ բոլոր մեղավորները, սկսած առաջին դեմքից, որոնք կապ ունեն մեր որդիների զոհվելու հետ, պատասխանատվության ենթարկվեն»: Այս մասին լրագրողների հետ հանդիպմանն ասաց 44-օրյա պատերազմում զոհված զինծառայողներից Հակոբ Ռոստոմյանի հայրը՝ Արա Ռոստոմյանը։

Նա նշեց, որ իրենց շարժման համար հիմքը հանդիսացավ ապրիլի 13-ին ԱԺ ամբիոնից Նիկոլ Փաշինյանի հայտարարությունը, թե «պատերազմում կարող էր լինել նույն արդյունքը, սակայն միայն առանց զոհերի»։

Ըստ ծնողների՝ այդ հայտարարությունը ինքնախոստովանական ցուցմունք էր, որն էլ միավորեց բոլոր ծնողներին՝ դիմել գլխավոր դատախազին և պահանջել պատժել մեղավորներին։ 

Արա Ռոստոմյանի խոսքով՝ այս ընթացքում իրենց զոհված որդիներին տուժող են ճանաչել, իսկ ծնողներին՝ տուժողի իրավահաջորդ։

«Դատախազությունը նաև փաստել է, որ մի շարք բարձրաստիճան պաշտոնյաների կողմից է տեղի ունեցել այդ ամենը։ Այսինքն՝ նաև դատախազությունն է փաստել, որ ՀՀ-ում կան պաշտոնյաներ, որոնք մեր որդիների զոհվելու պատճառ են դարձել»,- ընդգծեց Արա Ռոստոմյանը։

Նա միաժամանակ նշեց, որ Նիկոլ Փաշինյանին որպես մեղադրյալ ներգրավելու միջնորդությունը մերժվել է, և գործը տեղից տեղ են տեղափոխում։ «Սկզբից Հակակոռուպցիոն կոմիտեում էր, հետո՝ Քննչական կոմիտեում։ Մենք այդ կառույցներից որևէ ակնկալիք չունենք, դրա համար միջնորդություն ենք ներկայացրել, որ ՔԿ-ից գործը տեղափոխվի ԱԱԾ, քանի որ բոլոր հիմքերն ունենք ՔԿ-ին չվստահելու»,- ասաց Արա Ռոստոմյանը։

Կարին Տոնոյանն էլ նկատեց, որ իրենց նպատակը հենց Նիկոլ Փաշինյանին պատժելը չէ։

«Մենք ասել ենք՝ եթե Նիկոլ Փաշինյանը մեղավոր չէ, ինչո՞ւ եք այդքան խուսափում նրան հարցաքննության կանչելուց»,- նկատեց Տոնոյանը։

Ծնողներին թեև այնքան էլ վստահություն չի ներշնչում գործով զբաղվող պատկան մարմինների վերաբերմունքը, սակայն ամեն դեպքում պատրաստ են գնալ մինչև վերջ ու բացահայտել մեղավորներին։