Սա մի մեծ ոսկոր էր, որ մնալու էր այս իշխանության կոկորդին. Արծվիկ Մինասյան

Իշխանությունը փորձում է ամեն գնով ու ամեն պահի չարաշահելով իրավական բոլոր լծակները, բացահայտորեն իրականացնելով ապօրինություններ, պետական մակարդակի տեռոր, քաղաքական ակտիվ գործունեություն իրականացնող, հանրային հեղինակություն ունեցող անձանց նկատմամբ իրականացնել նման այլանդակ գործողություններ։ Այս մասին լրագրողների հետ զրույցում ասաց ԱԺ «Հայաստան» խմբակցության քարտուղար Արծվիկ ը։

Նրա խոսքով, Բագրատ Եսայանի պարագան առավել ցայտուն է, քանի որ լինելով նաև«Երկիր մեդիա» հեռուստաընկերության տնօրեն, իրականացնելով հստակ ազգային ուղեգծին ուղղված գործողություններ, սա մի մեծ ոսկոր էր, որ մնալու էր այս իշխանության կոկորդին:

«Արշավը հատկապես ակնհայտ է Դաշնակցության նկատմամբ. «Մոտավորապես 100-ից ավելի խուզարկություններ են իրականացվել Դաշնակցության տարբեր գրասենյակներում և կուսակցականների տներում։ Չհայտնաբերելով որևէ հանցավոր արարքին բնորոշ իր և այլն, իշխանությունը նյարդային խանգարմունքի մեջ է ընկել, սկսել է մարդկանց ապօրինի զրկել ազատությունից»,- ասաց Ա.Մինասյանը։

Մինասյանի խոսքով, ապօրինի կալանավորվածների թիվն անցնում է երեք տասնյակը, չհաշված հարյուրավոր քրեական գործեր, երբ եղել են ձերբակալություններ, ճանաչվել են ոչ իրավաչափ»։

«Իմ խորին համոզմամբ, սրանք թշնամական երկրների, թուրք-ադրբեջանական տանդեմի շահերը սպասարկող ռեժիմն են դարձել, անթաքույց են դա իրականացնում, իրենց առանձին պատգամավորներով, Նիկոլով, իրենց գործակալական ցանցով, օլիգարխիայի մի հատվածով։ Սրանք այնքան բացահայտ են սկսել սպասարկել թուրք-ադրբեջանական շահերը, որ նման բաները չպետք է մեզ բոլորիս զարմացնեն, այլ պահանջում է լինել ավելի համախմբված, ամուր, վստահ, որ սրանց իշխանության վերջը եկել է, մնում է հանրությունը համախմբի, հավաքվի ու մի լավ օր էլ քշի սրանց, լցնի բանտերն ու զնդանները։ Ի տարբերություն իրենց, իհարկե, արդար դատական համակարգով ամեն մեկը կարժանանա իր պատժին»,- ասաց Արծվիկ Մինասյանը։