ՏՄՊՊՀ նախագահը վստահեցնում է՝ գնանկում կա․ օրինակ՝ Նորզելանդական կարագի գինն իջել է ամբողջ 292 դրամով՝ 4692 դրամից դառնալով 4400 (տեսանյութ)

Հայաստանում կարագի շուկայում կան գերիշխող դիրք զբաղեցնող ընկերություններ։ Այս մասին հունիսի 23-ին լրագրողների հետ զրույցում ասել է Տնտեսական մրցակցության պաշտպանության հանձնաժողովի նախագահ Գեղամ Գևորգյանը:

Նա հստակ չի հիշում կարագի շուկայում գերիշխող դիրք զբաղեցնող ընկերությունների անունները։ Փոխարենը հերթական անգամ հիշեցնում է՝ իրենք գնաճ զսպող չեն ու ոչ էլ գին իջեցնող։

Գևորգյանը նկատում է, որ ի վերջո բոլորը գիտեն կարագի շուկայում դիրք զբաղեցնող ընկերությունների անունները և հավելում՝ կարևորը, որ գներն իջել են։

Իհարկե, կարագն այնքան է թանկացել, որ դրա գնի իջեցումը սովորական սպառողի համար տեսանելի չէ, բայց ՏՄՊՊՀ նախագահն այդ իջեցումը «զգալի» է որակում. «Նորզելանդական կարագի գինը 4692 դրամից իջել է 4400, իսկ «Անքորը»՝ 5038-ից 4690 դրամ»,- ասում է նա։

Ստացվում է, որ, օրինակ, Նորզելանդական կարագի1 կիլոգրամ գնելու դեպքում՝ գնորդը, վճարելով 4400 դրամ, տնտեսելու է ամբողջ 292 դրամ, իսկ «Անքոը» տեսակի կարագի դեպքում վճարելով 4692 դրամ՝ տնտեսելու է ամբողջ 348 դրամ․․․

Ըստ էության պարզ է, որ կարագի այդչափ թանկ լինելու պարագայում կիլոգրամի մեջ 300 դրամը փրկություն չէ, հատկապես, որ, դարձյալ թանկ գնի պատճառով, քաղաքացիներն այն գրամներով են գնում, ու ստացվում է, որ, օրինակ, 100 կամ անգամ 300 գրամ կարագ գնելու դեպքում, գնորդը տնտեսելու է 30-90 դրամ․․․

Անհասկանալի է, թե ինչու է ՏՄՊՊՀ նախագահը վրդովվում, երբ լրագրողներն ասում են, թե գնանկում չի եղել։ Էլ չենք խոսում այն մասին, թե վերջին 2-3 տարվա ընթացքում (վերջին ամիսներին՝ մասնավորապես) որքան են աճել գները, ու այդ ընթացքում ինչ տոկոսային տարբերությամբ են բարձրացել աշխատավարձերը կամ թոշակները․․․

Այս ֆոնին ասել, թե գնանկում կա՝ պարզապես ծիծաղելի է․․․ Ծիծաղելի՝ տրագիկոմեդիայի ժանրում․․․

Արմինե Մկրտումյան