Վրացի սահմանապահները խորհուրդ են տվել վերադառնալ, որովհետև որևէ կանխատեսում՝ երբ կգործի Լարսի անցակետը՝ չկա․ Զոհրաբյան (տեսանյութ)

Լարսի անցակետը ջրհեղեղի պատճառով անժամկետ փակ է։ Հայաստանից բեռնատարները, հիմնականում ծիրանով բեռնված, չգիտեն ինչ անել՝ ծիրանը փչանում է։
Ի դեպ, յուրաքանչյուր բեռնատարի համար 8 հազար դոլար է վճարվել։ Այս մասին ֆեյսբուքյան իր էջում գրել է ԱԺ նախկին պատգամավոր Նաիրա Զոհրաբյանը։

«Հասկանում եմ, որ բոլորը զբաղված են Նիկոլի թռցրած գրիչի «ամենաակտուալ» թեմայով, սակայն մեր հայրենակիցներին օգնել է պետք։

Ի դեպ, վրացի սահմանապահները խորհուրդ են տվել հետ վերադառնալ, որովհետև որևէ կանխատեսում՝ երբ կգործի Լարսի անցակետը՝ չկա։

Հասկանալի է, որ առնվազն առաջիկայում գյուղացիներից մասնավոր սեկտորը ՌԴ արտահանելու համար ծիրան չի գնելու, ինչը, ի դեպ, գնում էր մեկ կիլոգրամը 200 դրամով։

ՀՀ «ամենաժողովրդական» կառավարությունը պարտավոր է հենց գյուղական բնակավայրերում կազմակերպել և գյուղացիներից գնել ծիրանը, Երևանում և այլ բնակավայրերում հատկացնել հատուկ տարածքներ՝ ծիրանի իրացման համար։
Այլապես, վարկերի տակ գերեվարված գյուղացիական տնտեսությունները վերջնականապես սնանկանալու են և մեկ ամիս հետո ՄԱԿ-ի «Սովի քարտեզով» Հայաստանում ոչ թե 500 հազար սովյալ է լինելու, ինչպես հիմա է նշված՝ այլ մի 200 հազարով ավելի»,- գրել է Զոհրաբյանը։