Ինձ մեղադրում են, որ ես չեմ աշխատել դատախազության համակարգում. Գլխավոր դատախազի թեկնածու

Գլխավոր դատախազն առավելապես կազմակերպական գործառույթ է իրականացնում և Գլխավոր դատախազից եկող ազդակը` կամքի ուղղվածությունը, ազդակ է ամբողջ համակարգի համար։ Ի տարբերություն դատական համակարգի, որտեղ մենք ունենք հորիզոններ, դատախազական համակարգն ուղղահայաց համակարգ է, ըստ էության ծառայություն։ Այսինքն՝ հստակ ձևակերպած հանձնարարականը և հանձնարարականի նկատմամբ հետևողականությունը, ուղղահայաց համակարգերի արդյունավետ երաշխիքն է։ Այս մասին Ազգային ժողովում հարցուպատասխանի ժամանակ ասաց ՀՀ գլխավոր դատախազի թեկնածու Աննա Վարդապետյանը։ 

Վարդապետյանի խոսքով՝ գործող Գլխավոր դատախազությունն այդ հնարավորությունն օգտագործում է։ «Իմ մասնագիտական աշխատանքը, շփումները Գլխավոր դատախազության հետ, ցույց են տալիս, որ կամքը կա։ Իմ մոտեցումները տարբերվում են թերևս շեշտադրումների տեսանկյունից։ Ինձ մեղադրում են, որ ես չեմ աշխատել դատախազության համակարգում։ Յուրաքանչյուր գործ, որի վերաբերյալ ոչ փաստերով, իհարկե մասնագիտական քննարկում է տեղի ունենում, ապա ես դրան նայում եմ մարդու տեսանկյունից։ Եվ ինձ համար, իմ ամբողջ աշխատանքների ընթացքում, մինչև այսօր և դրանից հետո, կարևոր է լինելու, թե մենք պաշտպանում ենք մարդու իրավունքները և ոչ թե վերացական իմաստով այլ կոնկրետ դեպքերով»,- նշեց Վարդապետյանը։

Նրա խոսքով՝ այն կամքը, որը գալու է Գլխավոր դատախազի անձի դիրքից, մեկն է՝ Դատախազությունը չպետք է թույլ տա, որպեսզի տեղի ունենա ինքնադատաստան։ Դատախազությունը պետք է յուրաքանչյուր գործով տեղեկացված լինի, ընդհուպ մինչև՝ մասնագիտական քննարկումները, ընդհուպ մինչև Գլխավոր դատախազ։ 

«Եթե անհրաժեշտություն կա, որպեսզի Գլխավոր դատախազը մասնակցի որևէ քննարկման, ապա խնդրեմ․․․ Իմ աշխատանքի ընթացքում ես չեմ խուսափել որևէ քննարկումից, ընդհակառակը՝ ինքս եմ նախաձեռնել ու խնդրել, որ եթե ունեք քննարկման անհրաժեշտության որևէ հարցի հետ կապված, ապա համեցեք։ Դե պատճառը, որ իմ անձի հետ կապված բաներն են, որ միջամտում է, խանգարում է, ուղղություններ է տալիս, սակայն ընդամենը մասնագիտական քննարկումների մասին է խոսքը»,- նշեց Գլխավոր դատախազի թեկնածուն։