Սուսում բնակիչ չունենք, Աղավնոյում շարունակելու ենք պայքարը, իսկ Բերձորում մեր հայրենակիցների ապրելու հնարավորությունը շատ քիչ եմ համարում. Արայիկ Հարությունյան
Սուս համայնքում գրեթե բնակիչ չունենք։ Այս մասին այսօր՝ հունիսի 30-ին, Արցախի Ազգային ժողովում ասաց ԱՀ նախագահ Արայիկ Հարությունյանը՝ արձագանքելով դիտարկմանը, որ կառուցվում է ճանապարհ, որը Լաչինի միջանցքի երկայնքով է և դուրս է 5 կիլոմետր լայնությունից, որի հետևանքով էլ ի հայտ է եկել Բերձոր, Աղավնո և Սուս համայնքների հայաթափման հարցը:
Պատգամավորները հետաքրքրվեցին, թե արդյոք այս նոր կառուցվող ճանապարհը կապ ունի՞ 6-րդ կետում նկարագրված ճանապարհի հետ, թե՞ սա այլ ճանապարհ է։
«Ձեր կողմից տրվե՞լ է համաձայնություն, և համաձայնություն տալուց առաջ նկատի ունեցե՞լ եք նշված բնակավայրերի հայաթափման հարցը»,- հարցրեց պատգամավորը։
Արայիկ Հարությունյանը նշեց, որ երթուղու վերաբերյալ մի քանի առաջարկ է եղել Ադրբեջանի և ՌԴ-ի կողմից. բոլոր առաջարկությունները մերժվել են:
«Գործող մայրուղին, ավելի ճիշտ՝ առաջարկվողը, քննարկվել է մի քանի անգամ՝ Անվտանգության խորհրդում, որին մասնակցել են ԱԺ-ում ներկա բոլոր քաղաքական ուժերը: Մենք ընտրել ենք, ըստ մեզ, լավագույն տարբերակը: Կան գաղտնիքներ, որոնք ես չեմ ուզում այստեղ բարձրաձայնել: Ինչո՞ւ ենք ընտրել այդ տարբերակը՝ հենց հիմք ընդունելով անվտանգային հետագա մեր խնդիրը»,- ասաց Հարությունյանը։
Նա նշեց, որ հայաթափման մասին հարց չի քննարկվել և, որ խոսքը միայն Աղավնո բնակավայրի մասին է, քանի որ 2020 թվականի նոյեմբերի 9-ին հայտարարության 6-րդ կետում գրված է, որ մենք պետք է Բերձոր քաղաքից դուրս գանք, իսկ Աղավնոյի հարցով ԱՀ իշխանությունները բանակցությունները շարունակում են։
«Մենք որևէ մեկին չենք ասել՝ դուրս եկեք Բերձորից։ Սուս գյուղում մենք այսօր համարյա բնակիչ չունենք, նաև, որքան գիտեմ, սոցիալական ծրագրերի շրջանակներում, Բերձորի և Սուսի բնակիչները ստացել են իրենց համապատասխան փոխհատուցումները: Անկախ ամեն ինչից՝ մենք Բերձորը պետք է շրջանցենք: Բերձորում մեր հայրենակիցների հետագայում ապրելու հնարավորությունը շատ քիչ եմ համարում, Աղավնոյում շարունակելու ենք մեր պայքարը»,- ասաց Հարությունյանը։
Պատգամավոր Դավիթ Գալստյանը նկատեց, որ Նիկոլ Փաշինյանն ասում է, թե իբր յուրաքանչյուր հարց քննարկվել է ԱՀ իշխանության հետ․ «Այս դեպքում, եթե ամեն բան պարզ է և ամեն բան համաձայնեցրել եք, ինչո՞ւ հանրությանը չեք տեղեկացնում՝ ինչ է իրենց սպասվում»,- հարցրեց պատգամավորը։
Ի պատասխան՝ Արայիկ Հարությունյանը նշեց, որ ոչինչ գաղտնի չէ։
«Քննարկում ենք, քանի որ Երևանում ապրող պաշտոնյաները չեն պատասխան տալու։ Մենք ենք առաջինը քաղելու ամենածանր պտուղները»,- ասաց Արայիկ Հարությունյանը։ Նա նաև հավելեց, որ ամեն հարց չէ, որի մասին կարող է բարձրաձայնել։
Մանրամասները՝ տեսանյութում
